Disa këshilla nga Organizata Botërore e Shëndetësisë:
Si dhe kur duhet të përdoret maska?
Mbi 3 milionë njerëz të infektuar me koronavirus
Numri i të infektuarve me koronavirus në gjithë botën ka kaluar tre milionë.
Sipas shifrave të publikuara nga Universiteti Johns Hopkins, 3,002,303 njerëz janë të prekur nga sëmundja COVID-19, që e shkakton koronavirusi.
Numri më i madh i të infektuarve është në Shtetet e Bashkuara: mbi 972 mijë.
Pas SHBA-së, në listë janë pesë vende evropiane: Spanja, Italia, Franca, Gjermania dhe Mbretëria e Bashkuar.
Në gjithë botën, mbi 208,000 njerëz kanë vdekur nga koronavirusi.
Johnson: Ky është një moment i rrezikut maksimal nga koronavirusi
Mbretëria e Bashkuar është në momentin e rrezikut maksimal nga koronavirusi, tha kryeministri britanik, Boris Johnson, duke iu bërë thirrje njerëzve që të mos e humbasin durimin në izolim.
Komentet e Johnsonit janë të parat prejse është shëruar nga koronavirusi.
Ai tha se i kupton shqetësimet e pronarëve të bizneseve, që “mezi presin të marrë fund izolimi”, por, shtoi Johnson, lehtësimi i shpejtë i masave kufizuese mund të çojë në rritje të numrit të rasteve dhe të viktimave, si dhe në “katastrofë ekonomike”.
“Kërkoj nga ju që të keni durim”, tha Johnson.
“Ka shenja të vërtetë se tani jemi duke kaluar kulmin e sëmundjes”, tha ai, duke shtuar se në spitale ka më pak pranime të reja.
Në Mbretërinë e Bashkuar, mbi 20,700 pacientë kanë vdekur nga koronavirusi, ndërsa janë infektuar mbi 154,000.
Johnson është diagnostikuar me koronavirus më 27 mars. Më 12 prill ka dalë nga spitali, ku ka qëndruar për disa ditë.
Futbolli i Kosovës, ndërmjet pandemisë dhe garave evropiane
Bazuar në vendimin e fundit të Unionit të Federatave të Futbollit të Evropës (UEFA), ndeshjet në kampionatet e futbollit në Kosovë duhet të përfundojnë më së largu më 20 korrik dhe tashmë Federata e Futbollit të Kosovës (FFK) do të nisë përgatitjet për rifillimin e garave, të cilat janë ndërprerë për shkak të pandemisë së koronavirusit, njoftojnë zyrtarët e kësaj federate.
Siç thonë ata, më 21 prill, UEFA ka mbajtur video-konferencë me të 55 anëtarët e kësaj federate, ku është diskutuar çështja e rifillimit të kampionateve dhe ndeshjet parakualifikuese për edicionin e ri në Ligën e Kampionëve, si dhe për Ligën e Evropës të UEFA-s.
Sipas tyre, ky vendim i UEFA-s vlen për të gjitha vendet që janë të renditura mbi numrin 16 të ranglistës së UEFA-s, ndërkaq të parat kanë afat deri më 2 gusht.
Artikullin e plotë mund ta lexoni këtu.