Festivalet e filmit bashkohen për një alternativë digjitale
Festivale të mëdha të filmit, përfshirë atë të Berlinit, Kanës, Torontos dhe Venecias, do t’i bashkojnë forcat për një ngjarje online.
“Ne jemi një: Festivali Global i Filmit” do të nisë transmetimin në YouTube më 29 maj dhe do të zgjasë 10 ditë.
Kjo alternativë digjitale vjen pasi pandemia e koronavirusit ka anuluar shumë ngjarje të mëdha ndërkombëtare.
Festivali online thuhet se do të ndihmojë në mbledhjen e fondeve për Organizatën Botërore të Shëndetësisë, përkatësisht Fondacionin e saj për përgjigje ndaj koronavirusit.
Organizimi falas do të përfshijë filma, dokumentarë, muzikë, komedi dhe biseda.
Në total, njëzet festivale nga e gjithë bota do të jenë të përfshira.
Programi i plotë do të jetë në dispozicion muajin e ardhshëm.
A është koha për lehtësim të masave të izolimit?
Autoritetet në Kosovë ende nuk kanë ndonjë datë se kur mund të fillohet me lehtësimin e masave të izolimit kundër COVID-19.
Qeveria e Kosovës, më 13 mars, me konfirmimin e rasteve të para me koronavirus të ri, ka nisur zbatimin e masave për parandalimin e përhapjes së pandemisë, përfshirë mbylljen e shkollave dhe kufizimin e lëvizjes së qytetarëve në 90 minuta në ditë.
Drejtori i departamentit për informim në Ministrinë e Shëndetësisë në Kosovë, Faik Hoti, tha për Radion Evropa e Lirë se janë duke shikuar se si do të veprohet pas datës 4 maj.
“Masat aktuale janë në fuqi deri më 4 maj", tha Hoti.
Artikullin e plotë mund ta lexoni këtu.
Në Kosovë, 50 pacientë me koronavirus të shtruar në Infektive
Klinika Infektive e Qendrës Klinike Universitare të Kosovës njoftoi të martën se në këtë repart janë të shtruar 50 pacientë me koronavirus.
Në njoftimin e lëshuar për media thuhet se njëri prej tyre është në gjendje kritike, nëntë janë në trajtim me oksigjenoterapi, ndërsa 40 pacientë janë në gjendje stabile.
Gjashtë prej tyre janë shëruar dhe pritet të lirohen nga spitali, thuhet në njoftim.
Deri më tash, Instituti Kombëtar i Shëndetit Publik në Kosovë ka konfirmuar se 780 persona janë infektuar me koronavirus, 201 janë shëruar dhe 22 kanë vdekur.
Mbi 50 milionë njerëz të zhvendosur brenda vendeve të tyre - koronavirusi rrit rrezikun
Një rekord prej 50.8 milionë njerëzish në gjithë botën janë të zhvendosur brenda vendeve të tyre, për shkak të konflikteve ose katastrofave natyrore, thuhet në raportin më të ri të Qendrës për Monitorimin e Zhvendosjes së Brendshme.
Pandemia e koronavirusit mund t’i rrisë rreziqet për miliona njerëz tashmë të cenueshëm, thekson raporti.
Sipas tij, mbi 45 milionë njerëz janë detyruar t’i braktisin shtëpitë për shkak të dhunës, ndërsa pesë milionë të tjerë janë zhvendosur nga katastrofat natyrore, të tilla si tërmetet apo përmbytjet.
Shifrave u kanë kontribuar 33.4 milionë zhvendosje të reja, të regjistruara në vitin 2019, thuhet në raport.
“Koronavirusi i ri ka të ngjarë ta bëjë më të vështirë jetën e shumë prej këtyre njerëzve - disa prej të cilëve tashmë jetojnë të ngujuar dhe në kushte josanitare”, thekson raporti.
Pandemia e kufizon më tej qasjen e tyre në shërbime thelbësore dhe ndihmë humanitare, tha drejtoresha e Qendrës për Monitorimin e Zhvendosjes së Brendshme, Alexandra Bilak.