Edhe një viktimë nga koronavirusi në Shqipëri
Në Shqipëri ka vdekur edhe një pacient i prekur me koronavirus, duke e çuar në 30 numrin e përgjithshëm të viktimave në këtë vend.
Numri i të infektuarve është rritur në 24 orët e fundit për 14, përkatësisht në 750.
“Gjatë 24 orëve të fundit janë testuar 267 persona të dyshuar me COVID-19 [sëmundjen që e shkakton koronavirusi]. Nga rezultatet e testimeve janë konfirmuar 14 raste pozitive me COVID-19, nga të cilat 7 raste janë në Tiranë, 5 raste në Krujë dhe 2 raste në Shkodër”, bëri të ditur Albana Fico, nga Instituti i Shëndetit Publik në Shqipëri.
“Gjatë 24 orëve të fundit, 9 pacientë të tjerë i janë shtuar listës së të shëruarve, duke e çuar totalin e të shëruarve nga COVID-19 në 431”, shtoi Fico.
Koronavirusi zbraz arkat e xhamive
Besimtarët myslimanë në Kosovë paguajnë anëtarësinë në Bashkësinë Islame të Kosovës, nga 3 deri në 4 euro në vit, për çdo anëtar të familjes.
Por, pas ndalimit të tubimeve fetare në Kosovë, si masë mbrojtëse kundër përhapjes së koronavirusit, këto pagesa nuk janë duke u bërë.
Kjo ka bërë që të pakësohen edhe financat e Këshillave të Bashkësisë Islame.
Artikullin e plotë mund ta lexoni këtu.
Çfarë thotë OBSH-ja për heqjen e masave të izolimit?
Organizata Botërore e Shëndetësisë ka publikuar gjashtë kushte për vendet që konsiderojnë relaksimin e izolimit:
- Transmetimi duhet të kontrollohet;
- Sistemet shëndetësore kanë kapacitet për të zbuluar, testuar, izoluar dhe trajtuar çdo rast dhe gjurmuar çdo kontakt;
- Rreziqet e shpërthimit në ambiente të veçanta, si objektet shëndetësore dhe shtëpitë e pleqve, minimizohen;
- Masat parandaluese ndërmerren në vende të punës, shkolla dhe vende të tjera ku njerëzit domosdoshmërisht shkojnë;
- Rastet e importuara menaxhohen;
- Komunitetet janë plotësisht të informuara, të angazhuara dhe të afta për t’u përshtatur me "normën e re".
Austria vazhdon lehtësimin e masave të izolimit
Austria bëri publikë hapa të tjerë për lehtësimin e masave kundër koronavirusit.
Nga 1 maji, autoritetet thanë se do të lejohen ngjarjet me grupe prej dhjetë njerëzish, edhe pse atyre do t’iu kërkohet të qëndrojnë një metër larg njëri-tjetrit.
Rekomandimet për të qëndruar në shtëpi, pos për arsye të domosdoshme, do të skadojnë më 30 prill dhe nuk do të përtëriten.
Hotelet do të lejohen të rihapen më 29 maj, nëse gjithçka shkon mirë.
Megjithatë, puna nga shtëpia vazhdon të rekomandohet.
Dyqanet e vogla në Austri tashmë janë rihapur, ndërsa restorantet dhe kafenetë do të rinisin biznesin nga data 15 maj.
Austria ka raportuar rreth 15,000 raste me koronavirus dhe 569 viktima.