BE-ja ndan 1 miliard euro për vaksinën kundër koronavirusit
Bashkimi Evropian u zotua të hënën se do të ndajë një miliard euro për kërkimet globale të vaksinës kundër koronavirusit.
Kjo është një përpjekje e "ekipit të Evropës", tha presidentja e Komisionit Evropian, Urusla von der Leyen, derisa bëri publike shifrën.
"Shkalla e përgjigjes sonë duhet të përputhet me shkallën e krizës", tha presidenti i Këshillit Evropian, Charles Michel.
"Këto janë ditë të errëta, por ato janë gjithashtu ditë që zbulojnë anën tonë njerëzore", shtoi ai.
Komentet u bënë gjatë një konference virtuale të donatorëve, për mbledhjen e fondeve për zhvillimin e vaksinës kundër koronavirusit.
Irani rihap disa xhami
Irani i rihapi të hënën xhamitë në pjesët që konsiderohen me rrezik të ulët nga koronavirusi.
Ky vendim erdhi pasi autoritetet shëndetësore thanë se gati 80,000 njerëz të infektuar me koronavirus, janë shëruar dhe liruar nga spitalet.
Zëdhënësi i Ministrisë së Shëndetësisë, Kianoush Jahanpour, tha se në 24 orët e fundit janë regjistruar edhe 74 vdekje nga koronavirusi, të cilat e rrisin në 6,277 numrin e përgjithshëm të viktimave në Iran.
Të dielën, atje janë regjistruar 47 viktima, çfarë ka qenë shifra më e ulët në 55 ditë.
Xhamitë u lejuan të rihapen të hënën në 132 qarqe administrative të Iranit - apo në një të tretën e totalit - që konsiderohen me rrezik të ulët nga koronavirusi.
Besimtarët u detyruan të hynin në xhami me maska dhe doreza dhe të qëndrojnë vetëm gjysëm ore gjatë faljeve.
Xhamitë në Iran janë mbyllur në fund të shkurtit.
Autoritetet atje kanë filluar të përdorin një sistem të koduar me ngjyra: “të bardhë", "të verdhë" dhe "të kuq" për të klasifikuar rrezikun nga koronavirusi në pjesë të ndryshme të vendit.
Pasagjerëve të linjave ajrore do t’iu kërkohet të vënë maska
Disa kompani të mëdha ajrore do t’iu kërkojnë pasagjerëve të vendosin maska në fytyrë gjatë fluturimeve, për të frenuar përhapjen e koronavirusit.
Rreth 90% e fluturimeve ndërkombëtare janë anuluar, por linjat ajrore shpresojnë t’i rifillojnë gradualisht udhëtimet nga ky muaj.
Nga e hëna, kompania amerikane Delta tha se u kërkon pasagjerëve të vendosin maska ose mbulesa të tjera të fytyrës në zonën e kontrollit (check-in), të pritjes dhe gjatë gjithë fluturimit.
Ngjashëm, edhe kompanitë American Airlines dhe United thanë se do të fillojnë të kërkojnë maska për pasagjerët dhe për ekuipazhin e kabinës.
“Po bëjmë përpjekje për t’iu siguruar mirëqenie klientëve, në mënyrë që ata të udhëtojnë të qetë", tha Kurt Stache, zëdhënës i kompanisë American Airlines.
“Mbulimi i fytyrës do të jetë i detyrueshëm për të gjithë pasagjerët dhe ne do të ofrojmë maska falas për udhëtarët", tha Maddie King, zëdhënëse e United.
Si masë tjetër kundër koronavirusit, pasagjerët po ashtu do të inkurajohen të paketojnë vetë ushqimet dhe pijet e tyre gjatë udhëtimit.
Nuk është ende e qartë nëse këto do të jenë masa të përkohshme ose më afatgjata.
Koronavirusi ka prekur mbi 3.5 milionë njerëz në gjithë botën dhe ka lënë të vrarë mbi 248,000.