Disa dyqane hapin dyert
Disa biznese në Kosovë kanë filluar të punojnë, pasi ka filluar zbatimi i fazës së parë të lehtësimit të masave kufizuese kundër koronavirusit.
Maqedonia e Veriut do të rihapë kufijtë në koordinim me shtetet tjera
Ministri i Shëndetësisë i Maqedonisë së Veriut, Venko Filipçe, ka deklaruar se hapja e kufijve të këtij vendi me shtetet tjera do të varet nga stabilizimi i mëtejmë i gjendjes me koronavirusin, por ka theksuar se kjo nuk do të bëhet pa një koordinim me shtetet tjera, para së gjithash me ato fqinje: Shqipërinë dhe Greqinë.
Filipçe ka thënë se ka realizuar biseda telefonike me drejtuesit e ministrive të Shëndetësisë të dy vendeve, ndërsa të martën ka thënë se Organizata Botërore e Shëndetësisë do të mbajë një konferencë kushtuar shteteve të rajonit.
“Temë e bisedimeve do të jetë koordinimi për hapjen e kufijve dhe masat që do t’i ndërmarrin shtetet, sepse nuk do të mundemi, jo vetëm ne, por cilido shtet, të kemi strategji të suksesshme, nëse në ndonjë moment lëshohen udhëtarë nga jashtë, pa kontroll. Për këtë është i vetëdijshëm secili vend dhe për këtë bëhen këto takime koordinuese. Mund të sjellim masa të caktuara, të cilat do t’i respektojnë të gjithë qytetarët e të gjitha vendeve fqinje, nëse udhëtojnë kudo. Vetëm kjo mund të jetë një histori e suksesshme”, ka deklaruar Filipçe.
Ai ka njoftuar edhe nisjen e procesit të rifillimit të punës së bizneseve, kafeneve, restoranteve, qendrave tregtare dhe objekteve tjera, por nën masa të veçanta, me qëllim parandalimin e rritjes së numrit të rasteve me koronavirus.
Maqedonia e Veriut, të hënën, ka regjistruar shtatë raste të të infektuarve me koronavirus, ndërsa 47 të tjerë i janë shtuar listës së të shëruarve, e cila në tre ditët e fundit ka shënuar rritje të madhe.
Numri i përgjithshëm i rasteve të evidentuara me koronavirus në Maqedoninë e Veriut është 1,518, ndërsa numri i viktimave 85.
Në total, 992 persona janë shëruar, kurse 441 raste janë ende aktive.
Numri i përgjithshëm i testeve që janë kryer është 17,359.
Miliarda dollarë zotime për gjetjen e vaksinës kundër koronavirusit
Udhëheqësit botërorë u zotuan gjatë një konference virtuale se do të ndajnë miliarda dollarë për gjetjen e vaksinës kundër koronavirusit.
Konferenca u zhvillua të hënën dhe nikoqir i saj ishte Bashkimi Evropian.
Synim i deklaruar ishte mbledhja e së paku 8.2 miliardë dollarëve për të ndihmuar zhvillimin e vaksinës dhe të mjeteve të tjera kundër koronavirusit.
Por, sekretari i përgjithshëm i Kombeve të Bashkuara, Antonio Guterres, tha se objektivi nuk është shumë e madhe për të luftuar virusin ngjitës.
“Për të arritur secilin, kudo, do të na duhen ndoshta edhe pesë herë më shumë se ajo shumë”, tha Guterres.
Gjatë dy orëve konferencë, Komisioni Evropian tha se janë bërë zotime për rreth 5.9 miliardë dollarë.
Komisioni Evropian premtoi 1.1 miliard dollarë, ngjashëm si edhe Norvegjia.
Brenda BE-së, premtimet përfshijnë 573 milionë dollarë nga Gjermania, 545 milionë dollarë nga Franca dhe 153 milionë dollarë nga Italia.
Kanadaja, në anën tjetër, premtoi një kontribut prej 850 milionë dollarësh, Arabia Saudite 500 milionë dollarë dhe Britania 482 milionë dollarë.
Shtetet e Bashkuara, Kina dhe Rusia nuk morën pjesë në konferencë.
Numri global i të infektuarve me koronavirus ka kaluar tashmë 3.5 milionë, ndërsa i viktimave është mbi 248,000.
Pas SHBA-së, numrin më të madh të të prekurve e kanë pesë vende evropiane: Spanja, Italia, Mbretëria e Bashkuar, Franca dhe Gjermania.
Çekia rihap transportin ndërkombëtar nga 11 maji
Qeveria e Çekisë tha të hënën se do të heqë kufizimet në transportin rrugor dhe hekurudhor ndërkombëtar, nisur nga data 11 maj, dhe se do të lehtësojë edhe masa të tjera, të ndërmarra për frenimin e përhapjes së koronavirusit.
Çekia, vend me 10.7 milionë banorë, ka ndaluar transportin ndërkombëtar qysh më 14 mars.
Qeveria i ka mbyllur kufijtë dy ditë më vonë, për t’i rihapur ata në fund të prillit, me kushtin që udhëtarët të kenë test negativ të koronavirusit ose t’i nënshtrohen karantinës për dy javë.
“Po i lehtësojmë kufizimet në transport. Kalimi i kufijve do të jetë i mundshëm me autobusë dhe trena”, tha ministri i Transportit i Çekisë, Karel Havlicek.
Kinematë, parukeritë dhe qendrat tregtare janë në mesin e bizneseve që po ashtu do të rihapen nga 11 maji.
Po nga ajo datë do të lejohen edhe ngjarjet publike me më së shumti 100 njerëz.
Garat sportive do të lejohen po ashtu me numër të kufizuar ta audiencës.
Çekia ka mbi 7,700 raste të konfirmuara me koronavirus dhe 251 viktima.