Finlanda i lehtëson masat nga 1 qershori
Finlanda do të nisë lehtësimin e masave kundër koronavirusit nga 1 qershori.
Restorantet do të rihapen, ashtu si edhe disa shërbime publike, përfshirë: bibliotekat dhe objektet e sportit.
Ndalesa e tubimeve publike do të lehtësohet nga një maksimum prej 10 njerëzish në 50 njerëz.
Finlanda ka mbi 5,300 raste të konfirmuara me koronavirus dhe 240 viktima.
Air France e bën të obligueshme veshjen e maskës
Kompania ajrore e Francës Air France e ka bërë të detyrueshme vendosjen e maskave gjatë fluturimeve të saj.
Vendimi i ri për pasagjerët do të hyjë në fuqi nga java e ardhshme, kur edhe do të nisë lehtësimi i masave kundër koronavirusit në Francë.
"Në përputhje me udhëzimet e Francës që e bëjnë të detyrueshme veshjen e maskës në transportin publik, Air France do t'iu kërkojë klientëve të saj që të mbajnë maska gjatë fluturimeve, nisur nga 11 maji, 2020", tha përmes një deklarate Air France.
Kompania tha se pasagjerët do të duhet ta sigurojnë vetë maskën.
Linja ajrore po ashtu tha se do të zbatojë "distancën fizike" në bord, kur është e mundur.
"Në rastet kur kjo nuk është e mundur, vendosja e maskës siguron mbrojtje të përshtatshme shëndetësore”, tha Air France.
Serbia shpall zgjedhjet më 21 qershor
Zgjedhjet parlamentare dhe lokale në Serbi do të mbahen më 21 qershor, bëri të ditur presidenti i Serbisë, Aleksandar Vuçiq.
Vuçiq u takua paraprakisht me përfaqësuesit e partive politike, që kanë paralajmëruar daljen në zgjedhjet e ardhshme.
Zgjedhjet në Serbi është dashur të mbahen më 26 prill, por janë shtyrë për shkak të pandemisë së koronavirusit.
Më 15 mars, autoritetet atje kanë shpallur gjendje të jashtëzakonshme.
Është njoftuar se Parlamenti i Serbisë do ta heqë gjendjen e jashtëzakonshme të mërkurën, më 6 maj.
Vuçiq tha se nuk pret që të ketë ndonjë tubim të madh zgjedhor gjatë muajit maj, ndërsa për qershor tha se do të konsultohen mjekët.
Serbia ka konfirmuar mbi 9,500 raste të të infektuarve me koronavirus dhe 197 viktima.
Katër raste të reja me koronavirus në Kosovë
Në Kosovë u regjistruan të hënën katër raste të reja me koronavirus.
Instituti Kombëtar i Shëndetit Publik të Kosovës (IKSHPK) tha se ka testuar gjithsej 254 mostra të marra nga Klinika Infektive dhe gjurmimi i kontakteve të rasteve në terren.
“Rastet pozitive janë raste kontakti”, thuhet në njoftimin e IKSHPK-së.
Po ashtu bëhet e ditur se dy nga to janë nga Komuna e Mitrovicës, një nga Rahoveci dhe një nga Zhuri i Prizrenit.
IKSHPK-ja tha se të hënën janë shëruar edhe 22 pacientë, të cilët e çojnë në 403 numrin e përgjithshëm të të shëruarve.
Me shifrat e fundit, numri i të infektuarve në Kosovë shkon në 855.
Njëzetegjashtë pacientë me koronavirus kanë humbur jetën.
