Rastet në Nju Jork po bien, por shteti nuk është i gatshëm për t'u rihapur
Guvernatori i Nju Jorkut, Andrew Cuomo, tha se të dhënat aktuale tregojnë se asnjë rajon i këtij shteti nuk është ende i gatshëm të lehtësojë masat kundër koronavirusit.
Nju Jorku është epiqendra e pandemisë në Shtetet e Bashkuara.
Të dielën, atje janë raportuar 226 vdekje nga koronavirusi, krahasuar me 280 në 24-orëshin paraprak.
Por, Cuomo tha se numri i rasteve të reja dhe i viktimave nuk është duke rënë aq shpejt.
"Kemi shpresuar për një rënie më të shpejtë", tha Cuomo.
Në Shtetet e Bashkuara, mbi 68,000 njerëz kanë humbur jetën nga koronavirusi, ndërsa vetëm në Nju Jork kanë vdekur mbi 19,000.
OBSH: Pretendimet e SHBA-së për origjinën e koronavirusit janë spekulative
Organizata Botërore e Shëndetësisë tha se pretendimet e Shteteve të Bashkuara se koronavirusi e ka origjinën në një laborator nga qyteti Vuhan i Kinës, janë “spekulative”.
OBSH-ja tha se nuk ka marrë prova nga SHBA-ja që e mbështesin pretendimin e tillë.
“Nuk kemi pranuar ndonjë të dhënë apo provë specifike nga Qeveria e Shteteve të Bashkuara në lidhje me origjinën e supozuar të virusit. Kështu që nga këndvështrimi ynë, ky pretendim mbetet spekulativ”, tha dejtori për emergjenca pranë OBSH-së, Michael Ryan.
Ai po ashtu bëri thirrje për hetime të origjinës së virusit që “bazohen në shkencë” dhe jo në politikë.
Komentet vijnë një ditë pasi sekretari amerikan i Shtetit, Mike Pompeo, tha se "ka sasi të konsiderueshme të provave" se koronavirusi ka dalë nga një laborator i Vuhanit, edhe pse nuk dha më shumë detaje.
Transmetuesi shtetëror i Kinës i kritikoi ashpër komentet e Pompeos, duke i cilësuar ato si “të çmendura”.
CCTV tha përmes një raporti se pretendimi i Pompeos se “është një gënjeshtër e plotë”.
Rastet e para me koronavirus janë shfaqur në Vuhan të Kinës në fund të vitit të kaluar dhe, që atëherë, janë përhapur në mbi 180 vende të botës.
COVID-19, sëmundja që e shkakton koronavirusi, ka prekur mbi 3.5 milionë njerëz në botë dhe ka vrarë afro 250,000.
Mbi 8 miliardë dollarë donacione për luftimin e koronavirusit
Mbi 8 miliardë dollarë janë premtuar për zbulimin e vaksinës kundër koronavirusit.
Rreth 40 vende dhe donatorë morën pjesë të hënën në një samit virtual, të organizuar nga Bashkimi Evropian.
Presidentja e Komisionit Evropian, Ursula von der Leyen, tha se paratë do të ndihmojnë për të nisur një bashkëpunim të paparë global.
Ajo tha se zotimet për donacione tregojnë vlerën e vërtetë të unitetit dhe humanitetit, por paralajmëroi se në ditët e ardhshme do të duhen shumë më shumë.
Në total, mbi 30 vende, se bashku me agjencitë e Kombeve të Bashkuara dhe institutet kërkimore, bënë donacione.
Donatorët po ashtu përfshijnë këngëtaren amerikane, Madonna, e cila premtoi një milion dollarë, tha von der Leyen.
Komisioni Evropian premtoi 1.1 miliard dollarë, ashtu si edhe Norvegjia.
Brenda BE-së, Gjermania dhuroi 573 milionë dollarë, Franca 545 milionë dollarë dhe Italia 153 milionë dollarë.
Kanadaja, në anën tjetër, premtoi një kontribut prej 850 milionë dollarësh, Arabia Saudite 500 milionë dollarë dhe Britania 482 milionë dollarë.
Shtetet e Bashkuara, Kina dhe Rusia nuk morën pjesë në konferencë.
Nga paratë që u mblodhën, 4.4 miliardë do të shkojnë për zhvillimin e vaksinës, rreth dy miliardë për kërkimet e trajtimit dhe 1.6 miliard për prodhimin e testeve, tha Bashkimi Evropian.
Numri global i të infektuarve me koronavirus ka kaluar tashmë 3.5 milionë, ndërsa i viktimave është afro 250,000.
Organizata Botërore e Shëndetësisë sjell disa këshilla:
Kujdesi në shtëpi për personat e prekur nga koronavirusi
