Teste në njerëz dhe kafshë, bota po nxiton ta gjejë vaksinën
Shumë shtete në botë kanë filluar t’i lehtësojnë masat e izolimit, ndërkohë që ilaçi Remdesivir në SHBA po jep efekte premtuese në shërimin e personave të prekur me COVID-19, sëmundjen që e shkakton koronavirusi.
Zelanda e Re s’do t’i hapë kufijtë për kohë të gjatë
Kryeministrja e Zelandës së Re, Jacinda Ardern, tha se vendi i saj nuk do t’i hapë kufijtë me pjesën tjetër të botës “për kohë të gjatë”.
Kufijtë janë mbyllur për të frenuar përhapjen e koronavirusit.
Ardern i bëri komentet pasi mori pjesë në mbledhjen e kabinetit të Australisë, përmes një video-lidhjeje.
Dy palët diskutuan për mundësinë që njerëzit të lëvizin midis Zelandës së Re dhe Australisë pa pasur nevojë për t’iu nënshtruar karantinës.
Por, shtoi Ardern, vizitorët nga vende të tjera nuk do to lejohen së shpejti.
“Ne nuk do të kemi kufij të hapur për pjesën tjetër të botës për një kohë të gjatë", tha Ardern.
Turizmi është një nga industritë më të mëdha të Zelandës së Re, që punëson gati 10% të fuqisë punëtore të vendit dhe kontribuon pothuajse në 6% të bruto prodhimit të brendshëm.
Shumica e vizitorëve janë nga Australia, pastaj nga Kina, Shtetet e Bashkuara dhe Mbretëria e Bashkuar.
Zelanda e Re ka më pak se 1,500 raste të konfirmuara me koronavirus dhe 20 viktima. Javën e kaluar, ajo ka lehtësuar disa masa të izolimit.
Australia - e cila ka një popullsi prej rreth 25 milionë banorësh apo pesë herë më shumë se Zelanda e Re - ka gati 7,000 raste dhe 96 viktima.
Tridhjetetre pacientë me COVID-19, të shtrirë në QKUK
Klinika Infektive në Qendrën Klinike Universitare të Kosovës njoftoi të martën se në këtë repart aktualisht janë duke u trajtuar 33 pacientë të prekur me sëmundjen COVID-19, që e shkakton koronavirusi.
Sipas raportit të kësaj klinike, dy prej pacientëve janë në gjendje të rëndë shëndetësore, pesë janë në trajtim me oksigjenoterapi, ndërsa 26 të tjerët janë në gjendje stabile.
Në Kosovë janë konfirmuar gjithsej 855 raste me koronavirus.
Prej tyre, 403 janë shëruar, ndërsa 26 kanë vdekur.
India raporton numrin më të madh të rasteve me koronavirus në një ditë
India tha se ka regjistruar 3,900 raste të reja me koronavirus në 24 orët e fundit, çfarë është numri më i lartë brenda një dite.
Me këtë shifër, numri i të infektuarve në Indi shkon në 46,433, tha Ministria e Shëndetësisë.
Shifra totale përfshin edhe mbi 12,000 pacientë që janë shëruar nga koronavirusi dhe 1,568 që kanë vdekur.
Rritja e numrit të të infektuarve mund të ketë ndodhur për shkak të rritjes së testimeve - mbi 80,000 njerëz janë testuar të hënën në gjithë Indinë.