Mbi 100,000 të infektuar me koronavirus në Iran
Numri i të infektuarve me koronavirus në Iran ka arritur në 101,650, bëri të ditur Ministria e Shëndetësisë në këtë vend.
Një zëdhënës i saj po ashtu tha se në 24 orët e fundit janë regjistruar edhe 78 viktima nga koronavirusi, që e rrisin në 6,418 numrin total të tyre.
Irani është vendi më i goditur në Lindjen e Mesme.
Disa vëzhgues thonë se shifrat zyrtare mund të mos e paraqesin saktë situatën aktuale me koronavirus.
Kosovarja që ndihmon të prekurit me COVID-19 në Londër
Hedije Hoti nga Suhareka është kryeinfermiere në një spital në Londër. Dy muajt e fundit, ajo vazhdimisht ka ndihmuar pacientët me COVID-19.
Edhe mbi 200 të vdekur në Spanjë
Numri i viktimave nga koronavirusi në Spanjë u rrit për 244 në 24 orët e fundit.
Kjo është hera e parë qysh të shtunën që numri i viktimave në këtë vend rritet për më shumë se 200.
Në total, Spanja ka 25,857 të vdekur nga sëmundja COVID-19 që e shkakton koronavirusi.
Numri i të infektuarve atje aktualisht qëndron në 220,325.
Kryeministri i Spanjës, Pedro Sanchez, u kërkoi ligjvënësve të zgjasin gjendjen e jashtëzakonshme edhe për disa javë, duke thënë se “synimi është afër, por nuk jemi ende atje”.
BE parashikon "recesion të përmasave historike" këtë vit
Bashkimi Evropian tha të mërkurën se parashikon “recesion të përmasave historike këtë vit”, për shkak të ndikimit të pandemisë së koronavirusit.
Në parashikimin e parë zyrtar të dëmit nga pandemia thuhet se ekonomia e BE-së do të tkurret për 7.5 për qind këtë vit, përpara se të rritet për rreth 6 për qind vitin e ardhshëm.
Eurozona - grup prej 19 vendeve që përdorin monedhën euro - do të pësojë rënie ekonomike për 7.75 për qind, ndërsa do të rritet për 6.25 për qind më 2021.
"Evropa po përjeton një tronditje ekonomike, të paparë që nga Depresioni i Madh", tha përmes një deklarate komisionari për Ekonomi i BE-së, Paolo Gentiloni.
Sipas Qendrës Evropiane për Parandalimin dhe Kontrollin e Sëmundjeve, koronavirusi ka prekur mbi 1.1 milion njerëz në Evropë dhe ka vrarë mbi 137,000.
Masat e izolimit që i kanë ndërmarrë vendet për të frenuar përhapjen e koronavirusit, kanë dëmtuar shpenzimet e konsumatorit, prodhimin industrial, investimet, tregtinë, flukset e kapitalit dhe zinxhirët e furnizimit.
Ato po ashtu kanë ndikuar vendet e punës.
Norma e papunësisë në BE parashihet të rritet nga 6.7 për qind sa ka qenë në vitin 2019, në 9 për qind këtë vit, ka thënë Komisioni Evropian.