Merkel: Faza e parë e pandemisë është mbrapa nesh
Kancelarja gjermane, Angela Merkel ka thënë se ka folur me liderët e të 16 landeve gjermane, teksa ka bërë të ditura lehtësimin e disa masave të izolimit, pas shpërthimit të koronavirusit.
“Faza e parë e pandemisë është mbrapa nesh”, ka thënë ajo, ndonëse ka përmendur se “kjo është faza e hershme e pandemisë, e cila do të jetë aty gjatë”.
Distancimi fizik do të mbetet në fuqi në Gjermani deri më 5 qershor, ndonëse masat tjera do të lehtësohen gradualisht.
Pjesëtarë të të dy familjeve tani do të lejohen që të takohen në publik, ka thënë ajo.
Merkel ka thënë edhe se të dhënat e fundit nga Instituti gjerman Robert Koch, që raporton rreth të rejat të fundit për koronavirus, janë “lajme shumë të mira”.
“Shifrat tani janë të ulëta, kjo është diçka për të cilën jam e kënaqur”, ka thënë ajo.
Megjithatë, kufizimi i sërishëm i masave do të fillojë të zbatohet nëse numri i të infektuarve rritet sërish.
Gjermania deri më tani ka regjistruar më shumë se 167,000 të infektuar me koronavirus dhe më pak se 7,000 persona të vdekur.
“Nuk ka kthim në normale”, thonë shkencëtarë dhe yje të filmit
Rreth 200 shkencëtarë dhe personalitete të njohura kanë nënshkruar një letër të publikuar në të përditshmen franceze Le Monde, duke thënë se bota nuk mund të “kthehet në situatën normale” pas pandemisë me koronavirus.
Aktorë të famshëm si: Robert De Niro, Juliette Binoche, Adam Driver dhe Monica Bellucci kanë vënë nënshkrimin e tyre në këtë letër, ashtu sikurse shumë fitues të çmimit Nobel, ekonomistë, filozofë dhe astrofizikanë.
“Ndryshimet nuk janë të mjaftueshme, problemi është sistematik”, është thënë në letër.
Nënshkruesit e këtij dokumenti u kanë thënë thirrje liderëve që të rishikojnë “objektivat, vlerat, dhe kursimet”.
Mbi 3 milionë persona në gjithë botën janë infektuar me këtë virus, derisa mbi 200,000 në mesin e tyre kanë vdekur, si pasojë e sëmundjes Covid-19, që shkakton koronvirusi.
Teksa disa shtete kanë nisur të lehtësojnë masat e izolimit, ne kemi shikuar se cilat janë lehtësimet e para.
Shumica e afrikanëve do të mbeteshin pa ushqime në rast të izolimit
Më shumë se dy e treta e njerëzve të anketuar në 20 shtete të Afrikës kanë thënë se do të mbetnin pa ushqime dhe ujë, nëse do t’iu duhej të izoloheshin për 14 ditë.
Mbi gjysma e të anketuarve, ndërkaq, kanë thënë se do të mbetnin pa para.
Qendrat e Afrikës për Kontrollin dhe Parandalimin e Sëmundjeve kanë kryer hulumtimin për t’iu ndihmuar qeverive në hartimin e politikave për trajtimin e koronavirusit.
Ato paralajmërojnë se nëse masat nuk përshtaten me nevojat lokale, ekziston rreziku i trazirave dhe dhunës.
Deri më tani, Afrika ka regjistruar gati 50,000 raste me koronavirus dhe më pak se 2,000 vdekje.
Hulumtimi rekomandon që derisa shifrat mbeten të ulëta, vendet në kontinent "të ndërtojnë kapacitete në shëndetin publik për të testuar, gjurmuar, izoluar dhe trajtuar rastet me koronavirus”.