Izolimi ndaj koronavirusit i kushton Indisë me mbi 120 milionë vende pune
Izolimi ndaj koronavirusit ka bërë që 122 milionë indianë të humbin punën në muajin prill, tregojnë të dhënat e Qendrës për Monitorimin e Ekonomisë së Indisë.
Sipas saj, norma e papunësisë në Indi tani është 27.1 për qind.
Të dhënat e reja tregojnë se papunësia në Indi është katër herë më e madhe se në SHBA.
India nuk publikon të dhëna zyrtare për punën, por ato të Qendrës për Monitorimin e Ekonomisë janë gjerësisht të pranueshme.
India është futur në izolim qysh më 25 mars, për të frenuar përhapjen e koronavirusit.
Izolimi ka bllokuar pjesën më të madhe të aktivitetit ekonomik, përveç shërbimeve themelore, siç janë spitalet, farmacitë dhe dyqanet ushqimore.
India ka afro 50,000 të infektuar me koronavirus.
Sindikata thotë se po keqpërdoret Pakoja Emergjente Fiskale
Sindikata e Pavarur e Sektorit Privat në Kosovë shprehu shqetësimet e saj për, siç tha, keqpërdorim të Pakos Emergjente Fiskale nga kompanitë private.
Për t’iu dalë në ndihmë bizneseve dhe kategorive të tjera të shoqërisë që janë goditur nga pandemia e koronavirusit, Qeveria tani në detyrë e Kosovës ka miratuar Pakon Emergjente Fiskale, në vlerë prej rreth 180 milionë eurosh.
Kryetari i Sindikatës së Pavarur të Sektorit Privat, Jusuf Azemi, tha në një konferencë për media në Prishtinë se një pjesë e kompanive private kanë përfituar padrejtësisht nga Pakoja Emergjente Fiskale, përkatësisht nga masa 14 e saj që ka të bëjë me kompensimin e pagave për punëtorët.
Azemi tha se ka dëshmi se në disa raste, mjetet financiare të Pakos Emergjente kanë dalë në xhirollogarinë e punëdhënësit dhe jo të punëtorit.
“Janë bërë keqprdorime në përcjelljen e mjeteve. Pra, mjetet po shkojnë te pronarët dhe jo te punëtorët. Është një skandal. Me qëllim a pa qëllim, koha do ta dëshmojë”, tha Azemi.
Ai shtoi se pas një takimi që ka pasur me zëvendësministrin në detyrë të Financave dhe Transfereve, Agim Krasniqi, ka marrë zotime se ministria e tij do ta shqyrtojë këtë çështje.
Një ditë më parë, ministri në detyrë i Financave dhe Transfereve në Kosovë, Besnik Bislimi, në një postim në rrjetin social Facebook, dha disa sqarime për parregullsitë e pretenduara.
“Ministria e Financave ka pranuar përmes platformës së saj në Administratën Tatimore të Kosovës aplikime nga 26,422 biznese për kompensim me nga 170 euro për punëmarrësit e tyre. Numri i përgjithshëm i punëmarrësve është 126,000. Nga këto 26,422 biznese, vetëm 4.4% e tyre, ose 1,162 sosh kanë kërkuar kompensim në llogarinë e punëdhënsit (kjo për arsye se ata kanë dokumentuar që përkundër vështirësive, i kanë paguar pagat e punëtorëve të tyre)”, tha Bislimi.
Infografikë:
Ndihma emergjente në kohën e pandemisë
Pse larja e duarve mund të shpëtojë jetë?
Një nga gjërat më të mira dhe më të thjeshta për t'u mbrojtur nga koronavirusi është larja e duarve. Mjekët këshillojnë që ato të lahen me sapun dhe ujë të ngrohtë në mënyrë që të largohet infeksioni.
Shtetet e Baltikut hapin kufijtë me njëra-tjetrën
Kryeministrat e Letonisë, Lituanisë dhe Estonisë – që të trija vende të Bashkimit Evropian – thanë se do të krijojnë një “fluskë udhëtimi” brenda bllokut, duke hapur kufijtë për qytetarët e njëri-tjetrit nga data 15 maj.
Vendet e BE-së i kanë mbyllur kufijtë në mars, për frenimin e përhapjes së koronavirusit.
Zona e udhëtimit në Baltik do të jetë e para e këtij lloji në bllokun 27-anëtarësh, ku shumica e shteteve ua kanë ndaluar hyrjen të huajve.
Letonia, Lituania dhe Estonia kanë vendosur karantina të detyrueshme për secilin që ka shkuar atje për arsye që nuk lidhen me punën.
“Jemi pajtuar se të trija shtetet e Baltikut e kanë frenuar siç duhet përhapjen e koronavirusit dhe ne u besojmë sistemeve shëndetësore të njëra-tjetrës”, tha kryeministri i Lituanisë, Saulius Skvernlis.
“Andaj, nisur nga 15 maji, ne do t’i heqim të gjitha kufizimet për qytetarët e Lituanisë, Letonisë dhe Estonisë”, tha ai, për të shtuar se udhëtarët nga vendet e tjera do të duhet të vetizolohen për 14 ditë.
Tri vendet baltike janë anëtare të BE-së qysh në vitin 2004, ndërsa zonës së lëvizjes së lirë, Schengen, i janë bashkuar më 2007.