SHBA-ja “nuk është e sigurt” që koronavirusi doli nga laboratori
Shtetet e Bashkuara nuk janë të sigurta sa i përket origjinës së koronavirusit të ri, ka thënë Sekretari amerikan i Shtetit, Mike Pompeo para gazetarëve.
“Ne nuk jemi të sigurt, ndonëse ka të dhëna të rëndësishme që tregojnë se ka ardhur nga një laborator”, ka thënë ai.
“Këto dy deklarata mund të jenë të vërteta. Unë i kam bërë të dyja”.
Të dielën, Pompeo ka thënë se ka parë “shumë të dhëna” se virusi ka ardhur nga një laborator në Vuhan, çka ka shtyrë Kinën të prezantojë të dhëna për të vërtetuar këtë pretendim.
Komuniteti i inteligjencës ka thënë se virusi nuk është krijuar nga njeriu dhe se atij nuk është i janë modifikuar gjenet, ndonëse janë duke kërkuar për origjinën e tij.
Të martën, Pentagoni ka thënë se nuk ka të dhëna që përfundimisht tregojnë se koronavirusi është lëshuar me qëllim.
Shetet e Bashkuara janë prekur më së keqi në botë nga sëmundja Covid-19, që shkakton ky virus.
Numri i të infektuarve brenda ditës në Shtetet e Bashkuara aktualisht arrin shifrën 20,000, derisa mbi 1,000 të vdekur regjistrohen po ashtu në 24 orë.
Shtetet e Bashkuara kanë 1.2 milion raste të konfirmuara dhe mbi 71,000 persona të vdekur, si pasojë e sëmundjes Covid-19, që shkakton koronavirusi.
Këto të dhëna janë bërë të ditura nga Universiteti Johns Hopkins, i cili raporton në kohë reale për shkallën e të infektuarve me këtë virus në gjithë botën.
Trump: Task-forca për koronavirus do të fokusohet në rihapje të ekonomisë
Presidenti amerikan, Donald Trump ka thënë se task-forca për koronavirusin do të ndërrojë fokusin, për t’u angazhuar në rihapje të ekonomisë, një ditë pasi ka sugjeruar se ajo mund të shpërbëhet.
Trump ka thënë se ky grup “mund të funksionojë pa kohë të caktuar” dhe “të fokusohet në siguri dhe rihapje të shtetit”.
Ende nuk është bërë e qartë sesi saktësisht do të ndryshojë kjo task-forcë, mirëpo Trump ka thënë se “ne mund të shtojmë ose heqim njerëz nga ajo”.
Numri i të infektuarve brenda ditës në Shtetet e Bashkuara aktualisht arrin shifrën 20,000, derisa mbi 1,000 të vdekur regjistrohen po ashtu në 24 orë.
Zyrtarët shëndetësorë në SHBA kanë paralajmëruar se rihapja e bizneseve mund të ndikojë në përhapje të virusit.
Shtetet e Bashkuara kanë 1.2 milion raste të konfirmuara dhe mbi 71,000 persona të vdekur, si pasojë e sëmundjes Covid-19, që shkakton koronavirusi.
Këto të dhëna janë bërë të ditura nga Universiteti Johns Hopkins, i cili raporton në kohë reale për shkallën e të infektuarve me këtë virus në gjithë botën.
Kjo hartë tregon përhapjen e koronavirusit sipas të dhënave të Universitetit Johns Hopkins, Organizatës Botërore të Shëndetësisë dhe Worldometers.info. Të dhënat e tyre bazohen në informacionet e ofruara nga qeveritë. Në shumë shtete, ka kufizime në publikimin e këtyre informacioneve apo ka arsye përse nuk mund të tregohet në mënyrë të drejtë situata reale.
Metodologjia, transparenca dhe kualiteti i këtyre të dhënave mund të ndryshojë në mënyrë dramatike nga shteti në shtet.
Mbi 30,000 të vdekur nga koronavirusi në Mbretërinë e Bashkuar
Numri i të vdekurve si pasojë e koronavirusit në Britani është rritur për 649 në 24 orët e fundit, duke e çuar shifrën totale të viktimave në 30,076, ka njoftuar ministri qeveritar, Robert Jenrick.
Britania ka tejkaluar të martën Italinë me numrin e viktimave të lidhura me këtë virus në Evropë.
Ministri britanik për Komunitete dhe Qeverisje Lokale, Robert Jenrick ka thënë se kompanitë ndërtimore do të mund të rifillojnë punën nëse sigurojnë kushte mbrojtëse, në mënyrë që të mirëmbahet dhe përmirësohet infrastruktura e shtetit.
Sipas të dhënave të Universitetit Johns Hopkins, numri i personave të infektuar me koronavirus në Mbretërinë e Bashkuar, ka arritur në 196,244.