Policia e Kosovës arreston dy persona për ndërhyrje në sistem kompjuterik
Policia e Kosovës njoftoi se të enjten ka arrestuar dy persona, për keqpërdorim të kartelave bankare dhe ndërhyrje në sistem kompjuterik.
Në njoftimin e policisë, nuk bëhen të ditura detaje tjera lidhur me këta dy persona.
"Të dyshuarit me veprime të paligjshme përmes kompjuterëve kanë arritur të marrin në posedim të dhëna të shumta personale përfshirë kartela bankare, email adresa dhe fjalëkalime dhe pastaj në bashkëveprim me njëri tjetrin përmes këtyre të dhënave dhe kartelave bankare të klonuara kanë blerë online mallra të ndryshme", thuhet në njoftimin e policisë.
Në fund të muajit mars, Policia e Kosovës ka njoftuar se janë rritur rastet e sulmeve kibernetike.
Situata e krijuar me pandeminë e koronavirusit SARS-COV-2, sipas policisë, po shfrytëzohet nga persona keqbërës, të cilët keqpërdorin mundësitë teknologjike dhe internetin, me qëllim përfitimi material, por edhe qëlllime tjera të paligjshme.
“Që nga fillimi i shfaqjes së pandemisë COVID-19 është vërejtur një rritje e profileve të rrejshme në rrjete sociale, përmes të cilave keqbërësit kibernetikë kanë tentuar të përfitojnë duke dezinformuar me lajme të rrejshme. Gjithashtu, vërehet një rritje e lehtë në rastet që kanë të bëjnë me veprat penale ‘Hyrje në sistemet kompjuterike’ dhe ‘vjedhje e identitetit’, ku kryesisht keqbërësit kanë tentuar në mënyra të ndryshme të përfitojnë”, thuhej ndër të tjera, në njoftimin e policisë.
Afër armikut: Detajet e jashtëzakonshme të koronavirusit
Ky është një vështrim i nivelit mikroskopik të koronavirusit që ka shkaktuar pandemi.
Afër armikut: Detajet e jashtëzakonshme të koronavirusit
Turqia raporton për 57 të vdekur nga koronavirusi
Turqia ka raportuar se gjatë 24 orëve të fundit në këtë vend kanë vdekur 57 persona nga COVID-19 [sëmundja që e shkakton koronavirusi].
Numri i përgjithshëm i të vdekurve ka arritur në 3.641, tha ministria e Shëndetësisë e Turqisë.
Ky vend numëron 133,721 të infektuar nga koronavirusi, totali më i lartë jashtë Evropës Perëndimore, Shteteve të Bashkuara dhe Rusisë.
Deri më tani gjithsej 82.984 njerëz janë shëruar nga koronavirusi.
Franca përgatitet për daljen nga izolimi
Franca është e gatshme të fillojë me lehtësimin e masave që janë ndërmarrë për të parandaluar përhapjen e koronavirusit të ri, tha kryeministri i vendit.
Sidoqoftë, në disa rajone, përfshirë zonën e Parisit, masat do të vazhdojnë të jenë në fuqi.
Ky vend ka bërë një përparim të mjaftueshëm në ngadalësimin e përhapjes së virusit dhe uljen e numrit të pacientëve në spitale, dhe gradualisht mund të kthehet në 'status normal', tha kryeministri, Eduoard Philippe.
Shkollat, kafenetë dhe shumica e dyqaneve në këtë vend janë mbyllur për gati dy muaj.
Kryeministri gjithashtu tha se nëse virusi përhapet përsëri, qeveria do të rivendosë masat e izolimit në shkallë vendi.
Gjatë javës tjetër, rreth një milion nxënës dhe 130,000 mësues do të kthehen në shkollat fillore, njoftoi ministria e Arsimit në Francë, raporton Reuters.
Ministri i Brendshëm, Christophe Castaner, tha se përkundër lehtësimit të masave të 11 majit, kufijtë do të qëndrojnë të mbyllur dhe se vendimi do të mbetet në fuqi të paktën deri më 15 qershor.
Në Francë, 25.809 njerëz kanë vdekur nga COVID-19 [sëmundja që e shkakton koronavirusi i ri]. Sipas të dhënave të Universitetit Johns Hopkins, 174.224 njerëz janë infektuar me koronavirus, ndërsa pak më shumë se 54,000 janë shëruar.
