Infografikë:
Fuqia e sapunit
Mbi 25,000 të infektuar me koronavirus në Pakistan
Nurmri i të infektuarve me koronavirus në Pakistan ka kaluar 25,000.
Autoritetet atje kanë regjistruar në 24 orët e fundit 1,574 raste të reja, të cilat e rrisin në 25,837 numrin e përgjithshëm të të infektuarve.
Kjo është njëra nga shifrat më të larta në rajon, pas Iranit, i cili ka raportuar mbi 103,000 raste me koronavirus.
Në Pakistan, vend me rreth 220 milionë banorë, 594 persona kanë vdekur nga koronavirusi.
Pavarësisht këtyre shifrave, kryeministri i Pakstanit, Imran Khan, ka thënë se vendi i tij do të nisë daljen nga izolimi më 9 maj.
Koronavirusi lë në hije ngjarjet për Ditën e Fitores në Evropë
Vendet në gjithë Evropën shënuan të premten 75-vjetorin e mposhtjes së Gjermanisë Naziste në Luftën e Dytë Botërore.
Ajo që njihet si Dita e Fitores në Evropë e gjeti një pjesë të madhe të kontinentit të izoluar, për shkak të pandemisë së koronavirusit.
Mbi 146,000 njerëz kanë vdekur nga koronavirusi në Evropë.
Në Gjermani, presidenti Frank-Walter Steinmeier, kancelarja Angela Merkel dhe udhëheqës të tjerë të shtetit vunë kurora me lule në memorialin e viktimave të luftës dhe të dhunës në Berlin.
“Pandemia e koronavirusit po na detyron t’i mbajmë përkujtimet vetëm, larg atyre që janë të rëndësishëm për ne dhe të cilëve u jemi mirënjohës”, tha Steinmeier.
Ai u bëri thirrje gjermanëve “të mendojnë, të ndjejnë dhe të veprojnë si evropianë” në kohën e krizës së koronavirusit.
Gjetkë në Evropë, ngjarjet për Ditën e Evropës janë shtyrë, anuluar ose reduktuar në përkujtime online.
Mbretëresha britanike Elizabeth II do t'i drejtohet kombit përmes një adresimi televiziv.
Në Francë, presidenti Emmanuel Macron mori pjesë në një ceremoni në Paris, të mbyllur për publikun.
Në anën tjetër të kontinentit, Rusia ka planifikuar një paradë të madhe ushtarake në Moskë, por ajo është anuluar për shkak të koronavirusit.
Në Evropë rihapen disa lokacione kulturore
Teatrot, muzetë, kinematë dhe kopshtet zoologjike në Danimarkë do të rihapen nga 8 qershori, bëri të ditur qeveria e këtij vendi.
Ato janë mbyllur tash e sa javë, si masë për frenimin e përhapjes së koronavirusit.
Kufizimi i tubimeve, që aktualisht është në dhjetë njerëz, do të zgjerohet në 30 deri në 50, varësisht ngjarjes.
Në Greqi, lokacionet e lashta si Akropoli, Delphi dhe Olimpia e Lashtë, do të lejohen të rihapen më 18 maj.
Në Gjermani, disa muze janë rihapur të mërkurën.