Rastet e reja në Gjermani rriten për gati 1,000
Autoritetet në Gjermani thanë se kanë konfirmuar edhe 933 të infektuar me koronavirus, që e rrisin në 170,508 numrin e përgjithshëm të tyre.
Të dhënat e fundit paraqesin rritje të madhe, krahasuar me 357 rastet e reja, të raportuara një ditë më parë.
Por, sipas autoriteteve shëndetësore, kjo lëvizje mund të jetë pasojë e raportimeve të vonuara gjatë fundjavës.
Numri zyrtar i viktimave në Gjermani u rrit për 116, përkatësisht në 7,533.
Stafi i Shtëpisë së Bardhë urdhërohet të vendosë maska
Stafi i Shtëpisë së Bardhë u urdhërua të vendosë maska në fytyrë, pasi dy pjesëtarë të tij dolën pozitivë në testet për koronavirus.
Zyra e personelit të Shtëpisë së Bardhë tha se stafi duhet të mbulojë fytyrën në çdo kohë, përveç kur është ulur në tavolinë apo në distancë të mjaftueshme fizike.
Presidenti Donald Trump tha se e ka kërkuar këtë politikë.
Megjithatë, ai u paraqit pa maskë në konferencë për media, por tha se ndodhet “larg secilit”.
“Kemi qindra njerëz që hyjnë në Shtëpinë e Bardhë çdo ditë. Mendoj se jemi duke bërë një punë të mirë në frenimin e koronavirusit”, tha Trump.
Urdhri i ri për maska vjen pasi një ndihmës i nënpresidentit Mike Pence dhe një shërbëtor i presidentit Trump janë infektuar.
Shtetet e Bashkuara kanë numrin më të madh të të prekurve dhe viktimave me koronavirus.
Mbi 1.3 milion njerëz atje janë infektuar dhe mbi 80,000 kanë humbur jetën.
Numri i viktimave nga koronavirusi në SHBA kalon 80,000
Numri ditor i viktimave nga koronavirusi në Shtetet e Bashkuara ka qenë në rënie, por 830 rastet e vdekjeve, të raportuara të hënën, e kanë çuar në mbi 80,000 numrin e përgjithshëm të tyre.
Sipas të dhënave të Universitetit Johns Hopkins, SHBA-ja ka 80,682 viktima nga koronavirusi - më shumë se çdo vend tjetër në botë.
Ky vend ka po ashtu numrin më të madh të të infektuarve: mbi 1.3 milion.
Shifrat e fundit vijnë pasi disa vende në Evropë kanë lehtësuar tutje masat e izolimit të hënën.
Edhe guvernatori i Nju Jorkut, shtetit më të goditur amerikan, ka thënë se rihapja e ekonomisë atje do të rinisë më 15 maj.
Andrew Cumo ka thënë se kurba e të infektuarve të rinj në Nju Jork ka rënë ndjeshëm dhe se tani ndodhet në nivelin e 20 marsit, kur ka pasur afro 520 raste të reja.
Organizata Botërore e Shëndetësisë ka përsëritur të hënën se vendet duhet të kenë “vigjilencë të jashtëzakonshme” derisa lehtësojnë masat e izolimit.
Në gjithë botën, mbi 4.1 milionë njerëz janë infektuar me koronavirus dhe mbi 286,000 kanë vdekur.
Një zyrtar i Ministrisë së Drejtësisë në Kosovë, pozitiv në testin për koronavirus
Ministria e Drejtësisë e Kosovës njoftoi se gjatë ditës së hënë, një zyrtar i kësaj ministrie ka rezultuar pozitiv në testin për koronavirus.
Në njoftimin e lëshuar për media bëhet e ditur se zyrtari është karantinuar sipas udhëzimeve të Institutit Kombëtar të Shëndetit Publik të Kosovës (IKSHPK).
“Të gjithë zyrtarët e tjerë, të cilët kanë pasur kontakte me zyrtarin e identifikuar me Covid-19 [sëmundjen që e shkakton koronavirusi] janë karantinuar dhe pritet që, ditët në vijim, të testohen nga IKSHPK-ja”, thuhet në njoftim.
Të hënën, edhe kryeministri në detyrë i Kosovës, Albin Kurti, dhe disa zyrtarë të kabinetit të tij janë vetizoluar për shkak të kontakteve me një zyrtar që ka qenë në kontakt me një person të infektuar me koronavirus.
Më vonë është konfirmuar se zyrtari që është bërë shkas për vetizolimin e Kurtit dhe të tjerëve, ka dalë negativ.
Në Kosovë, gjithsej 895 vetë janë konfirmuar me koronavirus - prej tyre 657 janë shëruar dhe 28 kanë vdekur.