Zëdhënësi i Kremlinit infektohet me koronavirus
Dmitry Peskov, zëdhënësi i presidentit rus, Vladimir Putin ka thënë se ka dalë pozitiv në testin për koronavirus dhe tani është në spital, duke u trajtuar për sëmundjen Covid-19, që shkakton ky virus.
“Po, jam sëmurë. Jam duke u trajtuar”, është cituar të ketë thënë zëdhënësi i Kremlinit më 12 maj.
Peskov është i fundit zyrtar i lartë që infektohet me këtë virus në Rusi, i cili ka prekur edhe kryeministrin rus, Mikhail Mishustin, ministren e Kulturës, Olga Lyubimova dhe ministrin e Infrastrukturës, Vladimir Yakushev.
Ky njoftim ka ardhur një ditë pasi Putin ka thënë se Rusia është treguar e suksesshme në uljen e shkallës së infektimit me koronavirus, andaj ka bërë të ditura disa lehtësime të kufizimeve, të cilat janë marrë me qëllim të luftimit të kësaj sëmundjeje.
Sipas të dhënave të Universitetit Johns Hopkis, Rusia të martën është kthyer në shtetin e dytë të prekur më së keqi në botë me Covid-19, pasi ka regjistruar mbi 230,000 persona të sëmurë.
Emetimet e CO2-shit në Indi bien për herë të parë në gati katër dekada
Emetimet e dioksidit të karbonit në Indi kanë rënë për herë të parë në gati katër dekada.
Sipas një analize të bërë nga ueb-faqja britanike e mjedisit, Carbon Brief, kjo nuk ka ndodhur vetëm si rezultat i izolimit nga koronavirusi.
Zvogëlimi i përdorimit të energjisë elektrike dhe konkurrenca nga burimet e rinovueshme kanë dobësuar kërkesën për lëndë djegëse fosile edhe para pandemisë së koronavirusit, thuhet në analizë.
Megjithatë, sipas saj, ka qenë izolimi mbarëkombëtar në mars që ka kthyer mbrapsht trendin 37-vjeçar të rritjes së emetimeve të CO2-shit.
Studimi tregon se emetimet e tilla në Indi kanë rënë për 15% në mars dhe ka të ngjarë të kenë rënë për 30% në prill.
Ambientalistët shpresojnë se ajri i pastër këto ditë do të rrisë presionin e publikut ndaj Qeverisë indiane, për të pastruar sektorin e energjisë dhe për të përmirësuar cilësinë e ajrit.
Irani rihap të gjitha xhamitë përkohësisht
Të gjitha xhamitë në Iran, të mbyllura për shkak të pandemisë së koronavirusit, do të rihapen përkohësisht, nisur nga sot.
Drejtori i Organizatës për Zhvillimin Islamik, Mohammad Qomi, tha se vendimi është marrë në konsultim me Ministrinë e Shëndetësisë.
Ai tha se xhamitë do të jenë të hapura vetëm për tri ditë, për të shënuar disa net specifike të Muajit të Ramazanit.
Irani ka përjetuar shpërthimin më vdekjeprurës të koronavirusit në Lindjen e Mesme.
Mbi 6,600 njerëz kanë vdekur atje, ndërsa gati 110,000 janë infektuar.
Përkundër shifrave, autoritetet kanë nisur lehtësimin e disa masave të izolimit.
Shkollat do të rihapen javën e ardhshme, ka paralajmëruar presidenti Hassan Rohani.
Javën e kaluar, Rohani po ashtu ka thënë se xhamitë në 132 qarqe që konsiderohen me rrezik të ulët për përhapjen e koronavirusit, mund të hapen.
Infografikë:
Pse distancimi shoqëror është kaq i rëndësishëm?
