Zelanda e Re zbaton fazën e dytë të rihapjes së bizneseve
Mijëra biznese në Zelandë të Re janë rihapur të enjten, teksa ky shtet lehtëson kufizimet e vëna për frenim të koronavirusit.
Nëpër floktari, radhët e gjata të njerëzve janë parë edhe gjatë natës.
Kafiteritë, dyqanet dhe parqet publike janë hapur, teksa ky shtet ka kaluar në fazën e dytë të heqjes së kufizimeve, e cila është përshkruar si “normalja e re më e sigurt”.
Zelanda e Re nuk ka raportuar për raste të reja me koronavirus në tre ditët e fundit.
Autoritetet kanë thënë se mundësia e bartjes së virusit në komunitet është shumë e ulët.
Njerëzit janë lejuar që të vizitojnë familjarët e tyre, me një kufizim prej 10 personave.
Sipas të dhënave të Universitetit Johns Hopkins, Zelanda e Re ka regjistruar 1,497 raste të prekura me koronavirus, në mesin e tyre 21 pacientë kanë vdekur.
Në Rusi bie lehtë numri i të infektuarve me koronavirus
Rusia ka raportuar 9,974 raste të reja me koronavirus në 24 orët e fundit, duke shënuar shifrën më të ulët nga 2 maji.
Aktualisht Rusia është vendi i dytë i prekur më së keqi në botë me këtë virus, pas regjistrimit të 252,245 rasteve.
Qendra për përgjigjje ndaj koronavirusit në Rusi ka thënë se 93 persona kanë vdekur gjatë natës, duke e çuar shifrën zyrtare të të vdekurve në 2,305.
Numri i pasagjerëve në Aeroportin e Frankfurtit ka rënë për 97 për qind
Teksa shtetet evropiane janë duke konsideruar lehtësimin e kufizimeve për udhëtime gjatë verës, Aeroporti i Frankfurtit ka publikuar shifrat e pasagjerëve të tij gjatë muajit prill.
Gjatë këtij muaji në këtë aeroport kanë qenë 97 për qind më pak pasagjerë, në krahasimin me muajin e njëjtë të vitit të kaluar.
Ulje të mëdha të numrit të pasagjerëve janë regjistruar edhe në aeroportet tjera ndërkombëtare, pas shpërthimit të pandemisë me koronavirus.
Gati 300,000 persona në gjithë botën është raportuar të kenë vdekur me koronavirus, derisa më shumë se 4.3 milionë persona janë infektuar nga ai.
Një test për antitrupa ndaj koronavirusit shfaq “zhvillim pozitiv”
Një test që synon të vërtetojë nëse njerëzit kanë qenë të infektuar me koronavirus në të kaluarën, është miratuar nga zyrtarët shëndetësorë në Angli.
Zyrtarë të Shëndetit Publik në Angli e kanë konsideruar testin për antirupa, të zhvilluar nga kompania farmaceutike zvicerane, Roche, si “zhvillim shumë pozitiv”.
Ky test i gjakut identifikon nëse janë zhvilluar antitrupa nga sistemi imunitar kur një person është infektuar me këtë virus.
Antitrupat zakonisht krijojnë një shkallë të imunitetit për një kohë.
Deri më tani, zyrtarët nuk kanë qenë shumë të sigurt për vërtetësinë e këtij lloj testi.
Profesori, John Newton, koordinator kombëtar i Mbretërisë së Bashkuar për programin e testimit të koronavirusit, ka thënë: “Një testim i tillë, tejet specifik ndaj antitrupave është shumë i saktë sa i përket infektimit në të kaluarën”.
Gati 300,000 persona në gjithë botën është raportuar të kenë vdekur me koronavirus, derisa më shumë se 4.3 milionë persona janë infektuar nga ai.