Partitë taktizojnë me koronavirusin për datën e zgjedhjeve
Pas kritereve të përcaktuara nga Komisioni i Sëmundjeve Infektive mbi mënyrën e organizimit të zgjedhjeve parlamentare, tani mbetet që të caktohet edhe data, nëse deri në mbajtjen e tyre nuk do të ketë ndonjë përkeqësim të gjendjes me koronavirusin në Maqedoninë e Veriut.
Ministri i Shëndetësisë, Venko Filipçe ka deklaruar se qytetarët të drejtën e votës do ta realizojnë me maska mbrojtëse, dezinfektim të duarve dhe mbajtje të distancës prej dy metrave. Kritere të njëjta do të ketë edhe për këshillat zgjedhorë si dhe vëzhguesit e zgjedhjeve. Partitë do të mund të bëjnë organizime elektorale gjithashtu me rregulla të posaçme, me sa më pak njerëz dhe në distancë fizike.
Ekspertët ka thënë se protokoll i përcaktuar është në përputhje me gjendjen dhe praktikat që janë paralajmëruar edhe nga vende tjera. Ish-kryetari i Komisionit Shtetëror të Zgjedhjeve, Alekandar Novakovski ka thënë se tani i mbetet KSHZ-së që të zgjidhë problemet e vjetra, udhëzimet precize, rrjedhën e votimit, ndarjen eventuale të vendvotimeve, mbrojtjen e anëtarëve të këshillave votues, pastrimin e listës zgjedhore e çështje tjera.
Artikullin e plotë mund ta lexoni në këtë link.
Bullgaria do të rihapë qendrat tregtare
Bullgaria do të lejojë që qendrat tregtare të rihapen të hënën, si pjesë e planeve për të lehtësuar kufizimet e vendosura dy muaj më parë, për të ndaluar përhapjen e koronavirusit, tha kryeministri bullgar, Boyko Borissov.
Qeveria bullgare shpalli gjendjen e jashtëzakonshme më 14 mars duke ndaluar udhëtimet, mbyllur shkollat, restorantet dhe qendra tregtare.
Ky vend filloi të lehtësojë masat në fund të prillit, por vazhdoi të zbatojë rregulla të rrepta sociale.
Bullgaria, një vend me një popullsi më të vogël se 7 milionë, ende e mban në fuqi masën e distancës fizike në vendet publike dhe i mban të mbyllura kufijtë e saj.
Bullgaria ka 2.138 raste të konfirmuara të të infektuarve me koronavirusin e ri, duke përfshirë 102 vdekje.
Mali i Zi - afër eliminimit të koronavirusit!
Mali i Zi është në rrugë për t’u bërë një destinacion pa koronavirus, thonë autoritetet malazeze. Është vendi i parë në rajonin e Ballkanit Perëndimor që në dy javët e fundit ka raportuar pak ose fare raste të reja.
