“Moment historik” në Danimarkë, asnjë viktimë nga koronavirusi
Danimarka nuk raportoi asnjë vdekje të lidhur me koronavirusin - për herë të parë qysh më 13 mars.
Gjatë 24 orëve të fundit, numri i të infektuarve u rrit për 78, në 10,791, ndërsa numri i hospitalizimeve ra për 10, në 137.
Numri i viktimave mbeti i pandryshuar: 537.
"Moment historik: Në ditën e fundit kemi pasur 0 vdekje si rezultat i COVID-19 [sëmundjes që e shkakton koronavirusi] në Danimarkë", tha ministri i Shëndetësisë, Magnus Heunicke, në Twitter.
Danimarka ka hyrë në fazën e dytë të lehtësimit të masave të izolimit, duke lejuar rihapjen e shkollave për fëmijët më të rritur, postave tregtare dhe restoranteve.
Me gjithë lehtësimin e masave, e ashtuquajtura shkallë e riprodhimit, e cila tregon numrin mesatar të infeksioneve të shkaktuara nga një person me virus, ra në 0.7 në javën e parë të majit, nga 0.9.
"Kjo pasqyron faktin se epidemia është në rënie të shpejtë", tha Christian Wejse, shkencëtar në departamentin e sëmundjeve infektive në Universitetin Aarhus.
Deri më tash, sipas autoriteteve shëndetësore, 83 për qind e të diagnostikuarve me koronavirus në Danimarkë, janë shëruar.
Nga ata që kanë vdekur, 87% kanë qenë mbi 70 vjeç.
Republika Çeke lehtëson tutje masat e izolimit
Republika Çeke njoftoi se do të lehtësojë tutje masat kundër koronavirusit, pasi numri i të infektuarve në këtë vend mbetet ndër më të ulëtit në Evropë.
Nga data 25 maj, autoritetet thanë se do të lejojnë tubime deri në 300 vetë.
Nga kjo datë do të hapen edhe restorantet, tha ministri i Shëndetësisë, Adam Vojtech.
Qendrat tregtare, kinematë, parukeritë dhe terracat e restoranteve janë hapur të hënën, pas gati dy muajsh të mbyllura.
Çekia, vend me 10.7 milionë banorë, ka konfirmuar 8,352 raste me koronavirus dhe 293 viktima.
“Nëse situata epidemiologjike mbetet e favorshme, kufiri i tubimit të njerëzve do të rritet në 500 vetë më 8 qershor dhe në 1,000 vetë më 22 qershor”, tha Vojtech.
Lehtësime të tjera të masave të izolimit do të ndërmerren nëse numri i të infektuarve me koronavirus mbetet nën 100 brenda ditës, tha epidemiologu çek, Rastislav Madar, pjesë e një ekipi zyrtar të këshillimit.
Vizitat në spitale do të rifillojnë gjithashtu më 25 maj, megjithëse distanca fizike do të mbetet në fuqi.
Ekonomia gjermane hyn në recesion
Gjermania është zhytur në recesion pasi pësoi tkurrjen e saj më të madhe tremujore, që nga kriza financiare e vitit 2009.
Ekonomia më e madhe e Evropës u tkurr me 2.2% në tre muajt e parë të vitit 2020, pasi dyqanet dhe bizneset u mbyllën, në mes të marsit, për të luftuar përhapjen e koronavirusit.
Sidoqoftë, rënia nuk është aq e keqe sa në ekonomitë e tjera të mëdha evropiane siç janë Franca (5.8%) dhe Italia (4.7%).
Kjo është pjesërisht për shkak të një vendimi të 16 landeve të Gjermanisë për të lejuar që fabrikat dhe punishtet e ndërtimit të qëndrojnë të hapura, dhe një pakete shpëtimi nga qeveria.
Ekonomistët presin një rënie më të thellë në tremujorin e dytë të vitit, pasi efektet e plota të izolimit do të jenë më të dukshme.
Karantina në Qendrën e Studentëve nxit përplasje mes Thaçit dhe VV-së
Lëvizja Vetëvendosje ka kundërshtuar pretendimet e presidentit të Kosovës, Hashim Thaçi, se në karantinën që ndodhet në Qendrën e Studentëve, vendosen njerëz në mënyrë selektive dhe në baza politike.
"Presidenti edhe njëherë tha një mori të pavërtetash dhe nxiti sërish përçarje. Këto të pavërteta të formuluara kësilloj janë padyshim të qëllimshme dhe marrë parasysh institucionin që përfaqëson janë edhe të papranueshme. Këto deklarime që Presidenti tha janë larg të vërtetës ngase as nuk ka pasur vendime selektive mbi baza politike në Qendrën e Studentëve për karantim", thuhet në reagimin e Vetëvendosjes, parti kjo që udhëheq me qeverinë në detyrë të Kosovës.
Në një konferencë për media të mbajtur të premten, presidenti Thaçi kritikoi menaxhimin e karantinës në Qendrën e Studentëve nga ana e institucioneve qeveritare duke thënë se vendosja e personave aty, duhet të ndodhë në mënyrë profesionale dhe jo selektive.
"Me rëndësi është që karantinimi në konvikte të bëhe në mënyrë profesionale në raste të nevojshme e sidomos të mos vazhdojë të ketë qasje selektive politike, dikush të karantinohet e dikush jo, në bazë të lidhjeve dhe preferencave politike", ka thënë Thaçi.
Me qëllim të luftimit të koronavirusit të ri, të gjithë personat që synojnë të hyjnë në Kosovë, duhet t’i nënshtrohen karantinës në ambientet e Qendrës së Studentëve.