Zgjatet pezullimi i turneve të tenisit profesionist
Pezullimi i turneve të tenisit profesionist, për shkak të pandemisë së koronavirusit, do të vazhdojë deri më 31 korrik.
Vendimi i marrë të premten nga Shoqata e Profesionistëve të Tenisit (ATP) dhe Shoqata e Grave të Tenisit (WTA) prek turnetë në Gjermani, Shtetet e Bashkuara, Zvicër, Suedi, Meksikë, Kroaci, Letoni, Rumani dhe Austri.
"Për shkak të paqartësive të vazhdueshme përreth pandemisë COVID-19 [sëmundjes që e shkakton koronavirusi], me keqardhje njoftojmë vendimin tonë për të zgjatur pezullimin e turneve", tha përmes një deklarate kryetari i ATP-së, Andrea Gaudenzi.
Turnetë kanë qenë të pezulluara së paku deri më 13 korrik, për shkak të shqetësimeve për përhapjen e koronavirusit në turma ose në mesin e atletëve.
Wimbledon, turneu i përvitshëm në Londër, është anuluar, ndërsa French Open e ka shtyrë datën e fillimit nga fundi i majit për në fund të shtatorit.
Turneu në Nju Jork, U.S. Open, është planifikuar të fillojë më 24 gusht.
Jep dorëheqje ministri i Shëndetësisë i Brazilit
Ministri i Shëndetësisë i Brazilit, Nelson Teich, dha dorëheqje, pas më pak se një muaji në këtë detyrë.
Vendimi pasoi mosmarrëveshjet në lidhje me trajtimin e krizës së koronavirusit nga qeveria.
Teich e ka kritikuar një dekret të lëshuar nga presidenti Jair Bolsonaro, për të lejuar rihapjen palestrave dhe të salloneve të bukurisë.
Paraardhësi i tij është shkarkuar po ashtu për shkak të mosmarrëveshjeve me Bolsonaron.
Bolsonaro vazhdon t’i kundërshtojë masat e izolimit për shkak të koronavirusit.
Ai e ka minimizuar atë, duke e cilësuar si “grip të vogël”.
Brazili ka mbi 200,000 njerëz të infektuar me koronavirus dhe mbi 14,000 viktima.
Në izolim, dhuna në familje në rritje
Derisa miliona njerëz po strehohen në shtëpi gjatë pandemisë se koronavirusit, rastet e dhunës në familje po rriten në Rusi, në Shtetet e Bashkuara të Amerikës dhe në mbarë botën.
Rriten për 30% rastet e dhunës në familje në Kosovë
Ministrja në detyrë e Drejtësisë në Kosovë, Albulena Haxhiu, ka bërë të ditur se rastet e dhunës në familje këtë vit janë rritur për 30 për qind, krahasuar me vitin e kaluar.
Rritja e numrit të rasteve, sipas saj, ka ndodhur në kohën kur Kosova është duke kaluar nëpër pandeminë e koronavirusit të ri.
“Gjatë kohës së pandemisë, krahasuar me vitin e kaluar, dhuna në familje është rritur për 30% më shumë, bazuar në databazën që posedon Ministra e Drejtësisë. Kjo është shqetësuese dhe kërkon ngritjen e nivelit të përgjegjësisë së institucioneve, sidomos atyre të sigurisë dhe drejtësisë”, ka shkruar Haxhiu në një postim në rrjetin social Facebook.
Sipas Haxhiut, dhuna psikike, fizike, materiale dhe seksuale është vepër penale, prandaj çdo dhunues "duhet të dënohet sipas legjislacionit në fuqi".
Që nga kufizimi i lirisë së lëvizjes së qytetarëve në muajin mars, për shkak të koronavirusit, në Kosovë është raportuar për rritje të rasteve të dhunës në familje.
Kryeministri në detyrë, Albin Kurti, dhe kryetarja e Kuvendit të Kosovës, Vjosa Osmani, janë bërë pjesë e një fushate, përmes së cilës kanë kërkuar denoncimin e rasteve të dhunës në familje.
Përveç Kosovës, edhe vende të tjera të botës kanë raportuar shifra më të larta të rasteve të dhunës në familje, gjatë kohës sa pandemisë.