Rihapen disa plazhe në Francë dhe Itali
Franca dhe Italia kanë rihapur qindra plazhe, derisa banorët kanë pritur në rend për të zënë ndonjë vend.
Kjo pasi kufizimet e vëna për luftim të koronavirusit vazhdojnë të zbatohen, përfshirë distancimin fizik.
Autoritetet franceze kanë bërë thirrje për vetëpërmbajtje dhe kanë paralajmëruar se policia ka mandat për të penguar grumbullimet e mëdha.
Më herët edhe Greqia ka rihapur qindra plazhe, ndonëse me rregulla tejet të ashpra të lëvizjes.
Si ka ndikuar COVID-19 në prodhimin industrial në Evropë?
Si ka ndikuar COVID-19 në prodhimin industrial në Evropë?
Riatdhesohen 143 persona nga Gjermania në Kosovë
Ambasadori i Kosovës në Gjermani, Beqë Cufaj ka njoftuar se të shtunën janë kthyer në Kosovë, 143 shtetas të këtij vend nga Aeroporti i Shtutgartit.
“Nga fillimi i pandemisë dhe deri me këtë fluturim, misioni diplomatik i Republikës së Kosovës në Gjermani, përkundër të gjitha vështirësive, ka arritur të kthejë më shumë se 520 shtetas në Kosovë. Janë edhe qindra tjerë që po presin dhe i lus për mirëkuptim e durim”, është thënë në njoftim.
Me qëllim të luftimit të koronavirusit, autoritetet në Kosovë kanë marrë vendim që secili person që hyn në këtë shtet, t’i nënshtrohet karantinës shtatëditore në Qendrën e Studentëve në Prishtinë, si dhe më pas të vetizolohet në ambiente shtëpiake për dy javë.
Marrë parasysh të dhënat e fundit, 955 persona janë infektuar me koronavirus në Kosovë.
Prej tyre, 29 vetë kanë humbur jetën, derisa 691 janë shëruar.
Kryeministri spanjoll kërkon shtyrje të masave të izolimit
Kryeministri spanjoll, Pedro Sanchez ka thënë se do t’i kërkojë parlamentit për një shtyrje përfundimtare të gjendjes së jashtëzakonshme, të shpallur për shkak të pandemisë me koronavirus.
Sánchez ka thënë se dëshiron që kjo masë të shtyhet edhe për një muaj, në vend të dy javëve.
Aktualisht gjendja e jashtëzakonshme pritet të përfundojë në një javë.
Kryeministri spanjoll është përballur me kundërshtime në rritje pas kërkesës për vazhdim të fuqive ekzekutive, të cilat ia mundëson gjendja e jashtëzakonshme.
Rreth 100 persona kanë mbajtur protesta kundër qeverisë në Sevillë, pavarësisht kufizimeve në lëvizje.
Më herët gjatë ditës, autoritetet spanjolle kanë raportuar për shifrën më të vogël të të vdekurve me koronavirus për më shumë se dy muaj, 102.
Deri të shtunën, shifra totale e të vdekurve për shkak të këtij virusi në territorin spanjoll ka arritur në 27,563, derisa numri i të infektuarve është rritur në 230,183.