Foshnjat që mbetën pa nëna, ushqehen nga vullnetaret në Kabul
Stafi mjekësor në kryeqytetin e Afganistanit, Kabul, janë duke u kujdesur për foshnjat e porsalindura, të cilat kanë mbetur pa nënat e tyre për shkak të një sulmi me armë zjarri në një maternitet më 12 maj. Disa vullnetare janë paraqitur për të ushqyer me gji foshnjat. Ende është e paqartë se kush qëndron prapa këtij sulmi.
Policia e Kosovës ndalon 25 persona që s’i respektuan masat kundër koronavirusit
Për shkak të mosrespektimit të masave të vendosura për të frenuar përhapjen e mëtejme të koronavirusit, Policia e Kosovës ka ndaluar 25 persona.
Sipas njoftimit të Policisë së Kosovës, numri më i lartë i të ndaluarve është në Mitrovicën e Jugut, gjithsej 15-të.
Të hënën në Kosovë ka nisur faza e dytë e lehtësimit të masave kundër sëmundjes COVID-19, që shkakton koronavirusi.
Në këtë fazë parashihet të rihapen floktarët dhe sallonet e ondulimit, stomatologët dhe fizioterapeutët, tregtarët me pakicë dhe tregu i gjelbër, gastronomia, pra varianti ‘merre me vete’, transporti hekurudhor, transporti urban dhe ndërurban me leje të veçanta, qendrat e thirrjeve telefonike me lista të stafit esencial, si dhe galeritë dhe muzetë.
Qytetarët do të kenë mundësi që të dalin dy herë në ditë, nga dy orë, varësisht nga numri i fundit në letërnjoftim.Në fazën e parë, po ashtu është lejuar rihapja e disa bizneseve.
Megjithatë, Ministria në detyrë e Shëndetësisë ka paralajmëruar se mund të ashpërsojë masat e izolimit, nëse rritet numri i të infektuarve me koronavirus.
Deri më tani në Kosovë janë konfirmuar 985 raste të të infektuarve me koronavirusin e ri, nga të cilët 736 janë shëruar.
Në Klinikën Infektive po trajtohen 10 pacientë me COVID-19
Në Klinikën Infektive të Qendrës Klinike Universitare të Kosovës (QKUK) janë duke u trajtuar 10 raste me Covid-19, sëmundja që shkaktohet nga koronavirusi i ri.
"7 raste janë në gjendje stabile, 3 raste janë në gjendje më të rënduar në trajtim me oksigjenoterapi dhe përkujdesje intensive, 2 prej tyre janë duke u trajtuar në Mjekimin Intensiv të kësaj klinike, kurse nga klinika do të lirohen 5 raste", thuhet në një njoftim të QKUK-së.
Deri më tani janë konfirmuar 985 raste të të infektuarve me koronavirusin e ri, nga të cilët 736 janë shëruar.
Në Kosovë rastet e para me koronavirusin e ri u shfaqën më 13 mars.
Për të frenuar përhapjen e mëtejmë të virusit, autoritetet kanë shpallur gjendje emergjente të shëndetit publik.
Spitalet e Sao Paulos në Brazil afër kolapsit
Kryetari i qytetit më të madh të Brazilit, Sao Paulo, ka thënë se sistemi i tij shëndetësor mund të kolapsojë, pas rritjes së kërkesës për trajtime nga ana e pacientëve me koronavirusin e ri, raporton BBC.
Bruno Covas tha se spitalet publike të qytetit kishin arritur kapacitetin 90% dhe brenda dy javësh nuk do të kenë më vende për pacientë të rinj.
Sao Paulo është një nga rajonet më të goditura nga koronavirusi i ri, me gati 3,000 vdekje deri më tani.
Gjatë vikendit, Brazili kapërceu Spanjën dhe Italinë me numrin më të madh të të infektuarve nga koronavirusi i ri që e shkakton sëmundjen COVID-19.
Ministria e Shëndetësisë raportoi për 7.938 raste të reja në 24 orët e kaluara, duke e çuar numrin e përgjithshëm në mbi 241 mijë.
Vetëm SHBA-ja, Rusia dhe Mbretëria e Bashkuar kanë numër më të lartë.
Numri i të vdekurve në vendin e Amerikës Latine gjatë 24 orëve ishte 485.
Numri i përgjithshëm i viktimave tani është 16 118.
Ekspertët e shëndetit në Brazil kanë paralajmëruar se numri i vërtetë i të infektuarve mund të jetë shumë më i lartë se të dhënat zyrtare, për shkak të mungesës së testimeve.