Arrin në 104 numri i viktimave nga koronavirusi në Maqedoninë e Veriut
Në Maqedoninë e Veriut u regjistruan edhe tri viktima nga koronavirusi.
Ministria e Shëndetësisë e këtij vendi njoftoi të hënën për vdekjen e një gruaje të moshës 62-vjeçare nga Kumanova, të një burri nga Struga të moshës 59-vjeçare dhe të një tjetri të moshës 51-vjeçare nga Shkupi.
Të gjithë ata kanë ndërruar jetë në Klinikën Infektive në Shkup.
Me këto të dhëna, numri i përgjithshëm i viktimave nga koronavirusi në Maqedoninë e Veriut arrin në 104.
Ministri i Shëndetësisë, Venko Filipçe, bëri thirrje për respektimin e masave kufizuese, si kusht i vetëm dhe i domosdoshëm për, siç tha, përballje të suksesshme me pandeminë.
Ministria e Shëndetësisë njoftoi edhe për 25 raste të reja të të infektuarve, që u identifikuan gjatë 24 orëve të fundit.
Prej tyre, më së shumti u regjistruan në Shkup - gjithsej 16 raste.
Numri i të shëruarve gjatë 24 orëve të fundit është tetë - shifër kjo më e ulët në krahasim me ditët e kaluara.
Që nga fillimi i pandemisë me COVID-19, sëmundjen që e shkakton koronavirusi, në Maqedoninë e Veriut janë regjistruar 1,817 persona të infektuar; prej tyre 1,301 janë shëruar, 104 kanë vdekur, ndërsa 412 raste janë ende aktive.
Numri i testeve të kryera tash për tash qëndron në 21,722.
Hungaria dhe Sllovenia merren vesh për rihapje të kufijve
Hungaria dhe Sllovenia kanë rënë dakord për një rihapje graduale të kufijve të tyre deri më 1 qershor, tha ministri i Jashtëm hungarez Peter Szijjarto.
"Rihapja e ekonomive tona nuk është e mundur pa rifilluar bashkëpunimin ndërkombëtar", shkroi në profilin e tij në Facebook, ministri Szijjarto.
"Prandaj, pa rrezikuar mbrojtjen e shëndetit, është e nevojshme një lehtësim i masave kufizuese të vendosura në kufij", tha ai.
Më 15 maj, Sllovenia u bë vendi i parë evropian që shpalli zyrtarisht fundin e epidemisë së koronavirusit.
Njerëzit të cilët arrijnë në Slloveni nga vendet e tjera të BE-së nuk do të duhet më të zbatojnë një karantinë të detyrueshme për të paktën shtatë ditë, siç ka ndodhur që nga fillimi i prillit, thuhej në njoftimin e qeverisë sllovene.
Por, ata që hyjnë në Slloveni nga vendet që nuk janë anëtare të BE-së, me përjashtim të diplomatëve, duhet të hyjnë në karantinë në periudhë prej 14 ditësh.
Më 18 maj, qeveria e krahut të djathtë të kryeministrit hungarez, Viktor Orban, tha se do të paraqesë një propozim në parlament, për të hequr dorë nga fuqitë e jashtëzakonshme të cilat iu dhanë për të luftuar pandeminë.
Merkel dhe Macron me plan të përbashkët për rimëkëmbjen e BE-së
Presidenti i Francës, Emmanuel Macron dhe kancelarja gjermane, Angela Merkel pritet të dalin me një plan të përbashkët të vendeve të tyre, për rimëkëmbjen e BE-së nga kriza e pandemisë së koronavirusit.
"Plani ka të bëjë me fushat e shëndetësisë, rimëkëmbjen ekonomike, tranzicionin mjedisor dhe dixhital dhe sovranitetin industrial", tha presidenca franceze përmes një deklarate.
Ende nuk dihet detaje tjera të këtij plani, por ato pritet të shpalosen gjatë një konference të përbashkët për media, të cilën Macron dhe Merkel, do ta mbajnë më 18 maj.
Evropa sapo ka filluar të dalë nga masat e izolimit të vendosura për të parandaluar përhapjen e koronavirusit të ri.
Masat që u vendosën në mars e kanë ndaluar përhapjen e virusit, por edhe kanë shkaktuar dëme ekonomike për vendet e BE-së.
Gjermania, si ekonomia më e madhe e BE-së, tashmë ka hyrë në recesion.
Blloku evropian është zotuar të ndajë 500 miliardë euro fonde emergjente për të përballuar krizën.
Ekonomia e eurozonës në përgjithësi parashikohet të tkurret në 7.7 për qind këtë vit, por dëmi mund të jetë më i keq në Itali dhe Greqi. Ekonomitë e këtyre vendeve mund të tkurren me gati 10 për qind, raporton AFP.
Qeveria hungareze do të heqë dorë nga kompetencat e gjendjes emergjente
Qeveria e krahut të djathtë të kryeministrit hungarez, Viktor Orban, tha se do të paraqesë një propozim në parlament për të hequr dorë nga fuqitë e jashtëzakonshme të cilat iu dhanë për të luftuar pandeminë.
Më 30 mars, parlamenti i Hungarisë, ku partia Fidesz e Orbanit ka shumicën, miratoi legjislacionin për luftimin e pandemisë, duke i dhënë qeverisë të drejtën për të qeverisur me dekret për një kohë të pacaktuar.
Paketa e masave u kritikua për mungesë të një afati kohor të gjendjes së jashtëzakonshme.
Parlamenti i Bashkimit Evropian mbajti një seancë të veçantë më 14 maj për të diskutuar sundimin e ligjit në Hungari, gjatë së cilës, zyrtarët e BE-së shprehën shqetësimin për situatën e sundimit të ligjit në këtë vend.