Në Itali bie numri i viktimave dhe rasteve të reja me COVID-19
Në 24 orët e fundit, në Itali janë regjistruar 99 viktima nga koronavirusi, numër ky më i ulët krahasuar me 145 viktima që ishin një ditë më parë, njoftuan autoritetet.
Kjo është hera e parë që prej 9 marsit, që Italia regjistron më pak se 100 viktima në ditë nga sëmundja COVID-19, që shkaktohet nga koronavirusi.
Ndërkaq, në Itali, në 24 orët e fundit u shënuan edhe 451 raste të reja me koronavirus – shifra më e ulët me të infektuar brenda një dite që prej 2 marsit.
Në total, në Itali 225,886 persona janë infektuar me COVID-19. Ndërkaq, sipas shifrave të fundit 32,007 persona kanë vdekur nga koronavirusi, duke e bërë këtë vend, shtetin e tretë në botë me numrin më të madh të viktimave nga koronavirusi, pas Shteteve të Bashkuara dhe Britanisë.
Për shkak të koronavirusit, Uber largon nga puna 3,000 punëtorë
Shërbimi ndërkombëtar i taksive Uber tha se do të largojë nga puna 3,000 punëtorë më shumë, pasi në fillim të këtij muaji, kjo kompani kishte njoftuar se ka larguar nga puna 3,700 punonjës.
Këtë njoftim e bëri shefi ekzekutiv i kësaj kompania, Dara Khosrowshahi, i cili ka thënë se këto shkurtime janë për shkak të dëmeve që ka pësuar kjo kompani nga kufizimet e vendosura për të parandaluar përhapjen e koronavirusit.
Për shkak të pandemisë së koronavirusit, Uber është detyruar që pezullojë pothuajse tërësisht shërbimet e saja në Shtetet e Bashkuara dhe në pjesë të ndryshme të botës.
Gati dy e treta e të ardhurave të Uber gjenerohen në SHBA dhe Kanada, ku shërbimet e kësaj kompanie u ndërprenë në mesin e muajit mars. Megjithatë, kompania tha se pavarësisht se kërkesa për shërbime nga klientët ka rënë për 80 për qind në nivel global gjatë muajit prill, kjo kompani është duke u rimëkëmbur.
Për shkak të përhapjes së sëmundjes COVID-19, Uber ka mbyllur një sërë zyrash në mbarë botën.
Prishtinasit i gëzohen lehtësimit të masave
Në Kosovë ka nisur faza e dytë e lehtësimit të masave, të cilat u vendosën si pasojë e COVID-19 ku janë hapur shumë biznese si dhe linja të transportit. Po ashtu, edhe sportistët mund t’i fillojnë stërvitjet. Kjo fazë sipas Ministrisë së Shëndetësisë pritet të zgjasë deri më 1 qershor.
Pandemia i shkaktoi miliona humbje industrisë së qumështit në Kosovë
Vendosja e masave për parandalimin e përhapjes së koronavirusit të ri ka shkaktuar dëme të mëdha ekonomike për prodhuesit dhe përpunuesit e qumështit në Kosovë.
Përpos rënies së fuqisë blerëse, humbjet më të mëdha këtyre bizneseve u janë shkaktuar nga mbyllja e gastronomisë.
Krahas shitjes së produkteve në dyqane, markete dhe tregje të ndryshme, prodhuesit e produkteve nga qumështi furnizojnë restorantet e lokalet e ushqimit të shpejtë.
Milazim Berisha, pronar i fermës dhe qumështores “Eurolona”, njëherësh edhe kryetar i Shoqatës së Prodhuesve të Qumështit të Kosovës, thotë për Radion Evropa e Lirë se ky sektor nuk ka pasur përkrahjen e nevojshme institucionale që nga shfaqja e pandemisë.
Artikullin e plotë mund ta lexoni këtu.