Gjermania regjistron edhe mbi 500 raste të reja me koronavirus
Gjermania njoftoi të martën se numri i rasteve me koronavirus në këtë vend ka arritur në 175,210.
Instituti Robert Koch për Sëmundje Infektive tha se në 24 orët e fundit ka regjistruar 513 raste të reja.
Ai njoftoi edhe për 72 viktima, të cilat e rrisin në 8,007 numrin e përgjithshëm të tyre.
Gjermania, edhe pse ka numër të madh të të infektuarve, ajo ka numër më të vogël të viktimave krahasuar me vendet tjera evropiane: Mbretërinë e Bashkuar, Italinë, Francën dhe Spanjën.
Suksesi relativ i Gjermanisë në trajtimin e koronavirusit u është atribuar kryesisht testimeve masive.
SHBA kërcënon OBSH-në me ndërprerje të përhershme të fondeve
Presidenti i Shteteve të Bashkuara, Donald Trump, i dërgoi një letër kreut të Organizatës Botërore të Shëndetësisë, duke e kërcënuar me pezullim të përhershëm të fondeve amerikane, për shkak të pandemisë së koronavirusit.
Letra përmban një afat prej 30 ditësh për OBSH-në që të angazhohet në "përmirësime thelbësore"; në të kundërtën, siç thuhet, rrezikon të humbë miliona dollarë, ashtu si edhe anëtarësinë e SHBA-së.
E adresuar te shefi i OBSH-së, Tedros Adhanom Ghebreyesus, letra kritikon përgjigjen e OBSH-së ndaj koronavirusit, që nga shfaqja e tij në muajin dhjetor.
Aty thuhet se OBSH-ja i ka injoruar raportet e besueshme për përhapjen e virusit në Vuhan të Kinës, në fund të vitit të kaluar, dhe se ka bërë pretendime për koronavirusin që "ishin ose të pasakta, ose mashtruese".
Trump, muajin e kaluar, i ka pezulluar përkohësisht kontributet e SHBA-së në OBSH, duke e akuzuar atë për njëanshmëri ndaj Kinës.
Zyrtarët e OBSH-së i kanë mohuar akuzat, ndërsa Kina ka thënë se ka qenë ”transparente dhe e hapur”.
Të hënën, OBSH-ja është zotuar se do të bëjë një vlerësim të pavarur të përgjigjes së saj ndaj pandemisë së koronavirusit.
SHBA-ja është vendi më i prekur në botë nga ky virus ngjitës. Mbi 1.5 milion njerëz atje janë infektuar dhe mbi 90,000 kanë humbur jetën.
Trump merr ilaç për malarien, si mbrojtje e mundshme nga koronavirusi
Presidenti i Shteteve të Bashkuara, Donald Trump, tha se është duke marrë një ilaç për malarien, për të lehtësuar simptomat nëse sëmuret nga koronavirusi.
Trump tha se po merr hidroksiklorinë dhe një shtesë të zinkut çdo ditë, tash e një javë, dhe se nuk ka pasur asnjë efekt anësor.
“E gjitha që mund t’ju them është se, deri më tani, jam në rregull”, tha Trump.
Komentet e tij vijnë pavarësisht mungesës së provave se ilaçi është i sigurt ose efektiv në parandalimin ose trajtimin e COVID-19, sëmundjes që e shkakton koronavirusi.
Dy studime të mëdha, secili me rreth 1,400 pacientë në Nju Jork, kanë konstatuar së voni se nuk ka asnjë përfitim nga hidroksiklorina.
Dy studime të tjera, në Francë dhe Kinë, kanë arritur po ashtu në të njëjtin përfundim.
Trump i bëri komentet disa ditë pasi dy pjesëtarë të stafit të Shtëpisë së Bardhë kanë dalë pozitivë në testet për koronavirus.
Shtetet e Bashkuara janë vendi më i prekur në botë nga koronavirusi.
Mbi 1.5 milion njerëz janë infektuar atje, ndërsa mbi 90,000 kanë vdekur.
Mbi 90,000 të vdekur nga koronavirusi në SHBA
Numri i viktimave nga koronavirusi në Shtetet e Bashkuara ka kaluar 90,000.
Të dhënat e Universitetit Johns Hopkins tregojnë se ky vend ka 90,312 të vdekur nga koronavirusi – më së shumti në botë.
Shteti më i goditur atje është Nju Jorku, me mbi 28,000 viktma.
SHBA-ja po ashtu ka numrin më të madh të të infektuarve me koronavirus: mbi 1.5 milion.
Në Evropë, shtetet e goditura më së keqi janë: Mbretëria e Bashkuar, Italia, Franca dhe Spanja.