Amerika Jugore, epiqendra e pandemisë me koronavirus
Amerika Jugore është kthyer në epiqendër të pandemisë me koronavirus, me Brazilin e goditur më së keqi në këtë rajon, ndërkohë që po rriten rastet edhe në disa shtete afrikane që kanë pasur deri më tani numër të vogël të rasteve të vdekjeve, ka thënë Organizata Botërore e Shëndetësisë.
“Në një mënyrë, Amerika Jugore është kthyer në epiqendrën e re të përhapjes së sëmundjes”, ka thënë eksperti për emergjenca në OBSH, mjeku Mike Ryan, duke teksa ka shtuar se Brazili “është qartësisht vendi më i prekur”.
Ryan ka thënë se autoritetet braziliane kanë miratuar përdorimin e ilaçit kundër malaries, hydroxychloroquine, për t’i trajtuar pacientët e prekur me koronavirus.
Ai po ashtu ka njoftuar se nëntë shtete afrikane kanë pasur rritje për 50 për qind të rasteve të prekura me këtë virus në javën e kaluar, derisa të tjerat kanë përjetuar shkallë të normalitetit.
Shkalla e ulët e vdekshmërisë mund t’i atribuohet gjysmës së popullsisë të moshës 18 vjeç apo më pak, ka thënë ai, teksa ka shtuar se ende është i shqetësuar që kjo sëmundje mund të përhapet në kontinentin afrikan, i cili ka probleme të theksuara me shërbimet për kujdes intensiv dhe pajisje për ventilim.
Kosovës i shtohen 21 raste të reja me koronavirus
Instituti Kombëtar i Shëndetit Publik ka regjistruar të premten 21 raste të reja me koronavirusin e ri, pas kryerjes së 267 testeve.
“Rastet pozitive janë raste kontakti nga: komuna e Prizrenit 19 raste (sipas vendbanimit:15 raste Prizren, 1 rast Romajë, 1 rast Lubiçevë, 1 rast Kijevë dhe 1 rast Nashec) dhe nga komuna e Suharekës 2 raste (sipas vendbanimit:1 rast Bllacë dhe 1 rast Suharekë)”, është thënë në njoftim.
Po të premten është bërë e ditur se nga sëmundja, Covid-19, që shkakton ky virus, janë shëruar 10 pacientë, duke e çuar numrin total në 782.
Marrë parasysh të dhënat e fundit, në Kosovë deri më tani janë regjistruar 1,025 raste me koronavirus.
Prej tyre, 29 pacientë kanë vdekur.
Trump kërkon hapjen e objekteve fetare
Në një konferencë për media në Shtëpinë e Bardhë, presidenti amerikan, Donald Trump ka bërë thirrje për hapje të objekteve fetare “menjëherë”, duke e konsideruar këtë gjë “të domosdoshme”.
“Në Amerikë neve na duhet të lutemi më shumë, jo më pak”, ka thënë ai, teksa ka kritikuar guvernatorët shtetërorë, të cilët kanë lejuar hapjen e dyqaneve të pijeve alkoolike dhe klinikave për abort.
Kjo deklaratë ka ardhur teksa Qendra për Kontrollimin dhe Parandalimin e Sëmundjeve ka lëshuar udhëzime sesi mund të rihapen kishat.
Në udhëzimet e kësaj Qendre për rihapje të bizneseve dhe institucioneve tjera më herët gjatë muajit, nuk janë përmendur objektet fetare.
Sipas të përditshmes amerikane Washington Post, mungesa e udhëzimeve të tilla ka qenë për shkak të konservatorëve të afërt me nënpresidentin amerikan, Mike Pence, i cili ka kundërshtuar faktin që qeveria t’iu tregojë liderëve fetarë se çfarë duhet të bëjnë.
Mbajtja e kulturës gjallë në kohën e COVID-19
Nga filmat në makinë deri te koncertet në lagje, këto fotografi tregojnë se si arti dhe traditat fetare kanë mbizotëruar përmes kufizimeve të ashpra nga koronavirusi.
Mbajtja e kulturës gjallë në kohën e COVID-19
