Policia bllokon qendrën e Beogradit, forca policore në kampin e mbështetësve të pushtetit
Forca policore dhe automjete për shpërndarjen e demonstratave janë vendosur në parkun pranë Kuvendit të Serbisë në Beograd, ku prej më shumë se një viti e gjysmë qëndrojnë mbështetës të pushtetit, në një kamp me tenda të njohur si “Çacilend”.
Policia bllokoi pasditen e së dielës pjesën qendrore të qytetit. Rruga pranë parkut, ku ndodhen ndërtesat e Presidencës dhe të Komisionit Republikan të Zgjedhjeve, është mbyllur për automjete dhe këmbësorë.
Nuk ka një shpjegim zyrtar për këtë masë, ndërsa policët i thanë gazetares së Radios Evropa e Lirë se zona është mbyllur për “arsye sigurie”.
Incidente të raportuara gjatë zgjedhjeve në Serbi
Avokati i Popullit në Serbi tha se ka pranuar një sërë ankesash nga qytetarët,kryesisht të lidhura me konflikte dhe incidente afër qendrave të vendvotimeve, përfshirë pretendime të sulmeve ndaj më të moshuarve.
Ai dënoi “çdo formë të dhunës ndaj të moshuarve, si dhe sulmet ndaj anëtarëve të familjeve të politikanëve gjatë zgjedhjeve parlamentare, pavarësisht nga cila parti janë”.
Komisionari për Mbrojtje dhe Barazi, Millan Antonijeviq, raportoi në X për Euronews se nëna e Aleksandar Vuçiqit u sulmua në një vendvotim.
Në Pançevo, një grup i personave të maskuar kanë sulmuar disa të rinj para një qendre votimi, kanë raportuar mediat lokale.
Sipas një videoje të publikuar nga Pancevo.city, personat e maskuar me shufra hekuri sulmojnë të rinjtë dhe njëri prej të rinjve shihet i gjakosur në fytyrë.
Polica serbe, ndërkaq, gjatë ditës ka ndërhyrë në një lagje të Novi Sadit ku u mblodhën qytetarë. Disa persona thanë se kanë parë njerëz me para dhe zarfe.
Është raportuar edhe për ofendime dhe presion ndaj vëzhguesve zgjedhorë.
Komisioni Republikan Zgjedhor del me shifra të reja të pjesëmarrjes në zgjedhje
Sipas Komisionit Republikan Zgjedhor të Serbisë pjesëmarrja në zgjedhje deri në orën 16:00 është 56.38 për qind.
Deri në periudhën e njëjtë kohore, në zgjedhjet paraprake parlamentare të mbajtura më 2023, dalja në zgjedhje ishte 42.36 për qind.
Kryetari i Komisionit, Vlladimir Dimitrijeviq, tha se procesi i votimit po zhvillohet mirë.
Megjithatë, ai shtoi se ka pasur “incidente të vogla dhe parregullsi”.
Sipas Dimitrijeviqit, qendrat e votimit po zgjedhin incidentet kur munden, në të kundërtën po ndërhynë policia.
Ai vlerësoi se policia ka reaguar në mënyrën e duhur dhe se votimi po vazhdon pa pengesa.
Sa u përket ngjarjeve që kanë ndodhur jashtë qendrave të votimit, sipas Diminitrijeviq, nuk është përgjegjësi e punëtorëve zgjedhor, duke shtuar se prokuroria dhe policia po marrin masat e nevojshme.
