Policia te transmetuesi publik serb
Zyrtarë policorë janë parë në hyrjen e Radio Televizionit të Serbisë (RTS), që gjendet në rrugën Takovska, të Beogradit, sipas reporterëve të Radios Evropa e Lirë.
Zyrtarët policorë janë parë në një park afër ndërtesës së Parlamentit, teksa trafiku është ndaluar në qendër të Beogradit, ku gjendet edhe selia e Presidencës dhe Komisionit Republikan Zgjedhor.
Kongresisti Wilson: I shqetësuar nga raportimet për dhunë të mundshme nga Qeveria
Kongresisti amerikan, Joe Wilson, shprehu shqetësim lidhur me mundësinë e përdorimit të dhunës në Serbi nga Qeveria.
“Teksa qytetarët serbë po votojnë në numra rekorde, jam thellësisht i shqetësuar nga raportimet se Qeveria potencialisht po përgatitet të përdorë forcën kundër qytetarëve, me qëllim pengimin e procesit të votimit. Sulme të tilla janë krejtësisht të papranueshme. I bëj thirrje Serbisë që të mbetet paqësore”, shkroi kongresisti republikan Wilson në X.
Delegacioni i BE-së shpreh shqetësim për incidentet e dhunshme
Shefi i delegacionit të Bashkimit Evropian në Serbi, Andreas von Beckerath, tha se është “thellësisht i shqetësuar” për incidentet e dhunshme të raportuara në disa vendvotime në Serbi,
Në një postim në rrjetin social X, ai tha se qytetarët e Serbisë duhet të kenë mundësi ta ushtrojnë të drejtën e tyre demokratike të votimit në një mjedis të qetë dhe të sigurt.
“U bëjmë thirrje të gjithë aktorëve të ruajnë qetësinë, të veprojnë me përgjegjësi dhe të përmbahen nga dhuna dhe provokimet, ndërsa institucionet kompetente të garantojnë sigurinë e të gjithë atyre që marrin pjesë në procesin zgjedhor”, tha von Beckerath.
Arrestohen personat që sulmuan gazetarët
Personat që sulmuan gazetarë në Vranjë janë arrestuar, njoftoi zyra e prokurorisë në Serbi, raportoi agjencia Fonet.
I.K (57 vjeç) dhe D.A (28 vjeç) nga fshati Pavllovac janë arrestuar për sulmin ndaj redaktorit të portalit InfoVranjska, Mihajllo Stojkoviq, dhe gazetares së “Vecernje novosti”, Jellena Stojkoviq.
Prokuroria tha se personat e arrestuan ofenduan gazetarët, tentuan t’ua vidhnin telefonat dhe hodhën gurë drejt tyre.
Gazetarët raportohet se kanë marrë trajtim mjekësor për shkak të lëndimeve të lehta.
Të arrestuarit janë dërguar në ndalim për 48 orë dhe më pas prokuroria do t’i marrë në pyetje dhe do t’i njoftojë për akuzat ndaj tyre.