LVV me diferencë të madhe në vota me partinë e dytë
LVV-ja e Albin Kurtit po prin në zgjedhjet e 28 dhjetorit, teksa numërimi i votave është drejt përfundimit.
Me 93.43 për qind të votave të numëruara, LVV-ja ka 411.120 vota apo 49.99 për qind.
Diferenca në vota mes partisë së Kurtit dhe PDK-së së Bedri Hamzës – që është në vend të dytë me 21.07 për qind të votave – është 237.875 vota.
Partia e Kurtit rrugës për ta bërë Qeverinë
Sipas rezultateve të fundit të publikuara nga KQZ-ja, LVV-ja e Albin Kurtit është rrugës për të formuar ekzekutivin e ri të vendit.
LVV prin me 50.24 për qind të votave
Me 61.63 për qind të votave të numëruara, LVV-ja ka thelluar epërsinë ndaj partive të tjera, duke fituar 257.390 vota apo 50.24 për qind.
Renditja e partive të tjera të mëdha shqiptare është e njëjtë, me PDK-në në vend të dytë me 20 për qind, LDK-në me 14.16 dhe AAK-në me 6.57 për qind.
Lista Serbe, ndërkaq, ka fituar 3.1 për qind të votave.