Kredia prej 1 miliardë dollarësh që Rusia do t’i japë Serbisë nuk do të shoqërohet me kushte politike, tha kryeministri serb Mirko Cvetkoviq. Ky i fundit hodhi poshtë informacionet se Rusia po e kushtëzon kredinë me zgjerimin e monopolit rus mbi tregun serb të energjisë. Gazpromi rus kontrollon 51% të kompanisë më të madhe serbe të energjisë.
Shefi i qeverisë serbe theksoi se çdo lloj monopoli “do të dëmtojë integrimin e Serbisë në Bashkimin Evropian”. Sipas Cvetkoviqit përparësia strategjike e Serbisë është Bashkimi Evropian, derisa Rusia dhe Shtetet e Bashkuara renditen në vendin e dytë dhe të barabartë për nga rëndësia.
