Kryeministri irakian thotë se ofensiva ushtarake që po zhvillohet për të rimarrë qytetin Mosul nga grupi militant Shteti Islamik (IS), po përparon më “shpejt” se sa është menduar.
Haidar al-Abadi i bëri këto komente sot përmes një video-linku në takimin ndërkombëtar që po mbahet në Paris, për të ardhmen e Mosulit.
Abadi ka vlerësuar lartë bashkëpunimin e ushtrisë irakiane me forcat kurde, duke thënë se “ata janë duke luftuar së bashku në harmoni” për të çliruar territorin irakian.
Ofensiva për çlirimin e qytetit të dytë më të madh të Irakut, Mosulit, ka hyrë në ditën e katërt dhe forcat kurde dhe ato irakiane kanë arritur të marrin nën kontroll territore në këtë zonë.
Më herët gjatë ditës, luftëtarët kurdë kanë nisur një operacion për dëbimin e IS-ot mha fshatërat në lindje dhe veri të Mouslit.
Ushtria irakiane është duke lëvizur nga jugu dhe forcat speciale i janë bashkuar ofensivës dhe kanë përparuar drejt qytetit Bartalla.
Ofensiva për rimarrjen e Mosulit po mbështetet nga sulmet ajrore të koalicionit të udhëhequr nga Shtetet e Bashkuara.
