Raportet nga Siria thonë se autobusë me të shpërngulur kanë dalë sot nga pjesa lindore e Alepos, e cila ka mbetur nën rrethimin e rebelëve.
Dhjetëra autobusë me mijëra njerëz kanë arritur në perëndim të qytetit, tha një zyrtar i Kombeve të Bashkuara.
E njëjta u konfirmua edhe nga Vëzhguesi Sirian i të Drejtave të Njeriut, grup që monitoron luftën në Siri.
Më herët, autobusët e dërguar për evakuim janë djegur, duke penguar transportimin.
Këshilli i Sigurimit i Kombeve të Bashkuara do të mblidhet sot për të votuar një rezolutë, e cila i lejon OKB-së të monitorojë operacionin e evakuimit.
Rusia, më herët, e ka kundërshtuar këtë plan të hartuar nga Franca.
“Presim që të votojmë në mënyrë unanime për këtë tekst”, tha ambasadorja e Shteteve të Bashkuara në OKB, Samantha Power.
