Ndërlidhjet

Putin: Lidhjet me SHBA-të “nuk mund të jenë më të këqia”


Kombinim i fotografive të Donald Trumpit (djathtas) dhe Vladimir Putinit

Presidenti i Rusisë, Vladimir Putin, thotë se lidhjet me Shtetet e Bashkuara “nuk mund të jenë më të këqia” dhe është shprehur se shpreson se ai dhe Donald Trumpi do të diskutojnë për mënyrat për përmirësim të raporteve.

Duke folur aty kah fundi i konferencës vjetore me gazetarët në Moskë, që zgjati gati katër orë, Putin e ka cituar presidentin e zgjedhur amerikan, Donald Trump, që ka thënë se marrëdhëniet nuk mund të jenë më të këqia dhe se ai pajtohet me këtë.

“Së bashku ne do të mendojmë se si t’i bëjmë ato më të mira”, tha Putin.

Zoti Trump, që e fillon mandatin më 20 janar të vitit të ardhshëm, pat thënë se shpreson në përmirësim të lidhjeve me Rusinë.

Raportet ndërmjet armiqve të dikurshëm të Luftës së Ftohtë, që kanë armatim atomik, ishin përmirësuar në fillim të mandatit të parë të presidentit, Barack Obama, por janë përkeqësuar shumë pas ndërhyrjes së Rusisë në Ukrainë, pas mbështetjes së Moskës për regjimin sirian dhe mospajtime për çështje të tjera.

XS
SM
MD
LG