Dhjetëra pjesëtar të komunitetit serbë nga Kosova janë mbledhur ne Gazimestan, në periferi të Prishtinës që të shënojnë Vidovdanin, apo Ditën e Shën Vidit. Në Manastirin e Graçanicës u mbajt liturgjia e shenjtë, ndërsa nga orën 13:00, në Gazimestan filloi manifestimi i cili si zakonisht përcillet me një ritual fetar ortodoks serb.
Qytetarët e tubuar mbanin në duar flamuj të Serbisë dhe Rusisë.
Policia e Kosovës tha se ka hartuar një plan operativ dhe se ka ndërmarrë të gjitha masat e nevojshme për mbajtjen e rendit dhe sigurisë publike.
Qeveria e Kosovës tha se nuk i ka dhënë leje të hyjë në Kosovë ministrit serb të Mbrojtjes, Aleksandar Vulin, i cili paralajmëroi pjesëmarrjen në manifestimin në Gazimestan.
Zyra për Kosovën e Qeverisë së Serbisë tha se ky është një "veprim skandaloz" i Qeverisë së Kosovës.
“Është e qartë që një vendim i tillë është sjellë në koordinim midis Prishtinës dhe Shërbimit Evropian për Punë të Jashtme, me qëllim që ta poshtërojnë Serbinë”, tha përmes një komunikate Zyra për Kosovën në Qeverinë e Serbisë.
Jetlir Zyberaj, këshilltar i ministrit të Jashtëm të Kosovës, Behgjet Pacolli, tha përmes një postimi në Facebook se Policia e Kosovës do të zbatojë ligjin në rast të futjes ilegale të kujtdo në territorin e Kosovës.
Shënimi i Ditës së Shën Vidit lidhet me përvjetorin e 629-të të Betejës së Kosovës, që historia serbe e njeh si fitore shpirtërore të saj, pavarësisht humbjes së forcave ballkanike nga forcat e Perandorisë Osmane, si dhe vrasjes së princit serb Llazar.
