Vuçiq kërkon garanci për një kompromis për Kosovën
Presidenti serb Aleksandar Vuçiq tha se ulja e tensioneve në veri të Kosovës dhe vendosja e garancive për të shmangur lëvizjet e njëanshme janë temat kryesore të takimeve të tij me presidentin francez Emmanuel Macron dhe kancelarin gjerman Olaf Scholz në Moldavi.
“Pas kësaj duhet të fokusohemi në themelimin e Asociacionit të Komunave me shumicë serbe në Kosovë, i cili është nënshkruar dhjetë vjet e gjysmë më parë me Marrëveshjen e Brukselit. Besoj se njerëzit tani kanë një pasqyrë më të qartë të asaj që po ndodh, pavarësisht nëse vendet e tyre e njohin Kosovën apo jo”, tha Vuçiq.
Ai shtoi se nevojitet një zgjidhje e qëndrueshme kompromisi dhe se sipas tij njerëzit në Ballkan duhet ta kuptojnë se kompromisi nuk është diçka e keqe.
Hovenier: Qeveria ta qetësojë situatën në veri, të mos ketë më nevojë për pasoja
Ambasadori amerikan në Prishtinë, Jeffrey Hovenier, pas takimit me kryeministrin e Kosovës, Albin Kurti, tha se shpreson shumë se situate në pjesën veriore të Kosovës do të qetësohet sa më shpejt në mënyrë që të mos ketë nevojë për pasoja të reja për Kosovën.
Hovenier tha se qeveria duhet të punojë sa më shpejt në qetësimin e situatës në katër komunat veriore.
“Ka pasur disa pasoja, por shpresoj ta kalojmë që të mos ketë pasoja të tjera", tha Hovenier.
"Nuk jam në pozitë të them [cfarë mund të jenë pasojat e tjera]. Por, SHBA-ja po mendon se çfarë mjete të tjera ka për ta inkurajuar Qeverinë e Kosovës për ta bërë atë që ne mendojnë që është e rëndësishme të bëhet tani: arritjen e qetësimit të situatës”, tha Hovenier. Ai shtoi se i takon Qeverisë së Kosovës ta bëjë këtë gjë, dhe jo SHBA-së.
Lexo lajmin e plotë:
Për ju që sapo na jeni bashkuar, këto janë lajmet e fundit rreth situatës në veri të Kosovës:
- Sekretari amerikan i Shtetit, Antony Blinken, i bëri sërish thirrje Kosovës dhe Serbisë të ndërmarrin hapa të menjëhershëm për uljen e tensioneve në veri të Kosovës. Ai paralajmëroi se situata aktuale i pengon proceset e integrimit euroatlantik për të dyja vendet.
- Presidentja e Kosovës, Vjosa Osmani, dhe presidenti i Serbisë, Aleksandar Vuçiq, akuzuan njëri-tjetrin për rritjen e tensioneve në veri të Kosovës - zonë e banuar me shumicë serbe. Osmani fajësoi “bandat kriminale” serbe për dhunën atje.
- Kryeministri i Kosovës, Albin Kurti, ka thënë se "nuk e paramendon" zvogëlimin e pranisë së Policisë së Kosovës në komunat veriore të vendit, pa u larguar “bandat kriminale të nacionalizmit e shovinizmit të djathtë ekstrem, të cilët e adhurojnë Millosheviqin e Putinin”.
- Shefi i NATO-s, Jens Stoltenberg, tha se aleanca ushtarake është e gatshme të dërgojë edhe më shumë trupa në Kosovë, për të ruajtur paqen.
Osmani: Bandat kriminale po shkaktojnë dhunë në veri
Presidentja e Kosovës, Vjosa Osmani, dhe presidenti i Serbisë, Aleksandar Vuçiq, akuzuan njëri-tjetrin për rritjen e tensioneve në veri të Kosovës - zonë e banuar me shumicë serbe. Osmani fajësoi “bandat kriminale” serbe për dhunën atje, ndërsa Vuçiq tha se zgjidhje e krizës do të ishte tërheqja e kryetarëve shqiptarë nga komunat me shumicë serbe. Osmani dhe Vuçiq morën pjesë në një samit evropian në Kishinjev të Moldavisë.
