Kurti: Konstituimi i Kuvendit s’i shmang zgjedhjet e reja, nevojiten vota shtesë për presidentin
Kryeministri në detyrë, njëherësh kryetar i Lëvizjes Vetëvendosje, Albin Kurti, ka thënë se marrëveshja politike e arritur me Lidhjen Demokratike të Kosovës duhet t’i sigurojë edhe votat e nevojshme në mënyrë që të shmangen zgjedhjet e reja.
‘’Konstituimi i Kuvendit dhe formimi i qeverisë nuk i eviton zgjedhjet e reja, nëse nuk e zgjedhim edhe presidentin. Për ta zgjedhur presidentin neve na duhet që t’i kemi 2/3 [e deputetëve] të pranishëm në Kuvend”, tha Kurti.
Sipas tij, marrëveshja politike duket që s’ka qenë e mjaftueshme, “andaj ne e kemi të domosdoshme që t`i kemi aty të gjithë deputetët e marrëveshjes për kandidatin tonë të përbashkët prof.. Bekim Sejdiun ose të kemi edhe deputetë shtesë, pra kjo është shumë e rëndësishme’’.
Sa për t’jua kujtuar, Kurti më herët ka thënë se kanë 74 vota tani për tani, pas 6 deputetë të LDK-së thanë se nuk e mbështesin kandidaturën e Sejdiut.
Nevojitet prania e të paktën 80 deputetëve në sallë që votimi për president të jetë i vlefshëm.
PDK: Pas 16 shtatorit vendosim a e dërgojmë në Kushtetuese konstituimin e Kuvendit
Kryetari i Partisë Demokratike të Kosovës (PDK), Bedri Hamza, ka deklaruar para nisjes së seancës se nuk duhet të bëhen kalkulime politike që Kosova të mbetet pa Kuvend të konstituuar.
Nëse kjo seancë do të dërgohet në Gjykatë Kushtetuese për shqyrtim, Hamza tha se “është çështje që do ta vlerësojmë në ditët në vazhdim”.
Edhe deputeti i kësaj partie, Përparim Gruda, deklaroi se pas 16 shtatorit, ditës kur në Gjykatën Speciale merret vendimi për rastin e Thaçit dhe të tjerëve do të vendosin a e dërgojnë për interpretim kushtetues konstituimin e Kuvendit.
Megjithëse sipas tij Kuvendi duhet të përmbyllë konstituimin edhe pas afatit kushtetues.
“Shkelja e afatit nuk e shuan detyrimin për të themeluar Kuvendin”, tha Gruda para gazetarëve.
Pse nuk vazhdoi për një muaj seanca konstituive ?
Seanca konstituive e Kuvendit nuk vazhdoi për një muaj të plotë prej ndërprerjes së fundit më 8 gusht.
Kryesuesi i seancës, Avni Dehari, kishte pranuar kërkesën e kryeministrit në detyrë, Albin Kurti, që t’u jepet kohë shtesë për të arritur një marrëveshje politike për presidentin para se të vazhdohet me konstituim të Kuvendit.
Kurti atëherë kishte deklaruar se “konstituimi kësaj radhe nuk bën të jetë drejt një shpërndarjeje të Kuvendit dhe përsëri zgjedhjeve të parakohshme, të paarsyeshme e të panevojshme”.
Andaj, nuk kishte propozuar një kandidat për kryeparlamentar nga Lëvizja Vetëvendosje [LVV].
Rregullorja e Kuvendit parasheh që “ ndërprerjet gjatë seancës konstituive nuk mund të jenë më të gjata se 48 orë.”
Dy partitë opozitare Partia Demokratike e Kosovës [PDK] dhe Aleanca kanë bërë thirrje vazhdimisht gjatë muajit gusht që seanca konstituive të vazhdohej duke shkuar çdo 48 orë në sallën e Kuvendit.
Marrëveshja politike për presidentin, e cila ishte parakusht për Kurtin që të vazhdohej me seancën konstituive, u arrit më 31 gusht midis LVV-së dhe Lidhjes Demokratike të Kosovës (LDK).
Megjithëse votat për Bekim Sejdiun, kandidatin për të cilin u pajtuan të dy partitë, nuk janë tashmë të sigurta, mbetet e paqartë nëse veç dakordimi për emrin e tij do të mjaftojë që deputetët ta mbyllin të mërkurën konstituimin apo do të kërkohet sërish kohë shtesë.
Seanca mbahet mes akuzave për shkelje
Seanca konstituive vazhdon sot mes paqartësive dhe akuzave për shkelje kushtetuese.
Sipas një aktgjykimi të vitit të kaluar të Gjykatës Kushtetuese, Kuvendi duhet të konstituohet brenda 30 ditësh nga certifikimi i rezultateve.
Ky afat përfundoi më 7 gusht 2026, pasi rezultatet e zgjedhjeve të qershorit u certifikuan më 8 korrik.
Në një përplasje midis deputetëve të opozitës dhe atyre të Lëvizjes Vetëvendosje më 12 gusht kur Kuvendi priste vizitorë nga diaspora, ministrja në detyrë e Drejtësisë, Donika Gërvalla, kishte argumentuar se kishin kohë 30 ditë për ta konstituuar Kuvendin nga dita kur ishte thirrur seanca konstituive më 6 gusht.
“Është 6 shtator”, kishte deklaruar Gërvalla sa i përket ditës së fundit të këtij afati, i cili tashmë është tejkaluar.
Instituti i Kosovës për Drejtësi (IKD) vlerëson se konstituimi i Kuvendit është një obligim kushtetues që nuk duhet të anashkalohet, pavarësisht shkeljes së afateve kushtetuese.
“Konstatimi i kësaj shkeljeje nuk nënkupton se shkelja duhet të vazhdojë. Përkundrazi. Fakti se Kuvendi nuk është konstituuar brenda afatit kushtetues nuk mund të shërbejë si argument që Kuvendi të mos konstituohet as pas kalimit të këtij afati”, thuhet në reagimin e IKD-së.
Sipas tyre përfundimi i afatit nuk mund të nënkuptojë përfundimin e detyrimit për t'i bërë institucionet funksionale.
“Shkelja që ka ndodhur duhet të konstatohet dhe të mos relativizohet, por ajo nuk mund të përdoret për të prodhuar një bllokadë të re dhe potencialisht të pakufishme”.