Kryetarja e porsazgjedhur e Kuvendit të Kosovës, Albulena Haxhiu.

Haxhiu zgjidhet kryetare e Kuvendit, e shtyn seancën konstituive për të premten

9 shtator 2026

Preferoje REL-in në Google

Deputetët e Kuvendit të Kosovës rizgjodhën Albulena Haxhiun në postin e kryetares, por nënkryetarët nuk u hodhën në votim
Ligjvënësit kanë mospajtime për mënyrën e votimit të nënkryetarëve. Pengesë u bë edhe formulimi i përdorur nga Lista Serbe, që propozoi për nënkryetar Sllavko Simiqin
Formulimi “në emër të popullit serb” u pa si jokushtetuese nga kryetarja Haxhiu, që e shtyu seancën deri të premten
Bërja e Kuvendit të ri t'i hapte rrugë formimit të qeverisë së re dhe zgjedhjes së presidentit të ri
Zgjedhja e presidentit ka qenë në qendër të krizës politike këtë vit dhe mund të shkaktojë sërish zgjedhje të reja

11:36

Albulena Haxhiu zgjidhet kryetare e Kuvendit të Kosovës

Deputetja Albulena Haxhiu është zgjedhur kryetare e Kuvendit e legjislaturës së njëmbëdhjetë.

Ajo mori 62 vota për, 16 kundër, ndërsa 13 veta abstenuan.

Haxhiu, e cila ushtron edhe postin e presidentit nga 4 prilli, do të vazhdojë edhe më tutje këtë detyrë deri në zgjedhjen e presidentit të ri.

Albulena Haxhiu ishte edhe kryetare e legjislaturës së dhjetë e cila u shpërnda më 1 korrik 2026.

11:32

Albulena Haxhiu kandidate për kryetare të Kuvendit

Glauk Konjufca i Lëvizjes Vetëvendosje e propozoi Albulena Haxhiun për kryetare të Kuvendit.

11:19

Zemaj i LDK-së nuk pret që të përmbyllet konstituimi i Kuvendit

Deputeti i Lidhjes Demokratike të Kosovës, Armend Zemaj, pret që konstituimi i Kuvendit të shtyhet edhe më tej e të mos përmbyllet në seancën e sotme.

Zemaj tha se ai nuk do ta votojë kandidatin e Lëvizjes Vetëvendosje për kryetar të Kuvendi.

A tregoi se partia do ta propozojë Kujtim Shalën për nënkryetar të Kuvendit nga radhët e LDK-së.

“Tash jemi në një situatë ku ka besim që ka shkelje të Kushtetutës për shkak të afateve, por vullneti politik i subjekteve politike që t`i japim Kosovës institucione ka qenë si vullnet mirëbesimit por, ajo çka shihet qartë, kurthet politike në dëm të interesave të qytetarëve të Kosovës nga Lëvizja Vetëvendosje dhe Albin Kurti mund të jenë të pritshme edhe në seancën e sotme”, tha ai.

11:17

Bale thotë se nuk e voton Sejdiun për president

Deputetja e Unionit Socialdemokrat, Duda Bale, ka thënë se, përderisa nuk ka marrëveshje me Lëvizjen Vetëvendosje, nuk do të votojë për kandidatin për president, Bekim Sejdiu.

Bale theksoi se nuk është duke parë ndonjë mundësi se si do të zgjidhet presidenti i ri.

“Unë deri tash nuk kam pas asnjë takim me përfaqësuesit e Lëvizjes Vetëvendosje, nuk kemi pas asnjë marrëveshje, asnjë takim, derisa është kështu nuk e shoh të arsyeshme me jap votën teme”, ka deklaruar ajo, para fillimit të vazhdimit të seancës konstituive.

Shfaq më shumë