Çmimet e gazit natyror në Evropë vazhdojnë të rriten
Çmimet e gazit natyror vazhdojnë të rriten ndjeshëm, ndërsa konflikti në Lindjen e Mesme përshkallëzohet.
Sipas raportimeve të publikuara sot, çmimi referencë i gazit në Evropë është rritur për 33%.
Kjo lëvizje vjen pas një rritjeje tjetër prej rreth 50% të hënën.
Po atë ditë, kompania qeveritare e Katarit, QatarEnergy - një nga eksportuesit më të mëdhenj të gazit në botë - ndaloi prodhimin pas “sulmeve ushtarake” ndaj objekteve të saj.
Centcom publikon pamje të shkatërrimeve në Iran
Zyrtarët ushtarakë amerikanë thanë se kanë shkatërruar qendrat e komandës së Korpusit të Gardës Revolucionare Islamike (IRGC), sistemet e mbrojtjes ajrore të Iranit, si dhe vendet për lëshimin e raketave dhe dronëve.
"Forcat amerikane, në operacionet e vazhdueshme, kanë shkatërruar objektet e komandës dhe kontrollit të Korpusit të Gardës Revolucionare Islamike, aftësitë e mbrojtjes ajrore të Iranit, vendet e lëshimit të raketave dhe dronëve, si dhe aeroportet ushtarake", shkroi Komanda Qendrore e SHBA-së, Centcom, në një postim në X.
Izraeli zgjeron praninë ushtarake në jug të Libanit
Forcat e Mbrojtjes së Izraelit njoftuan se kanë dërguar trupa më thellë në jug të Libanit, përtej pesë pozicioneve të mëparshme.
"Ushtarë nga Divizioni Rajonal i 91-të 'Galilea' janë vendosur në pika të shumta pranë kufirit, për të forcuar sigurinë në veri të Izraelit", tha përmes një deklarate ushtria izraelite.
Aty, po ashtu, theksohet se ushtria po kryen sulme të shënjestruara ndaj infrastrukturës së Hezbollahut, për të neutralizuar kërcënimet dhe për të parandaluar infiltrimin në territorin izraelit.
Zgjerimi i pranisë ushtarake vjen pas një sërë sulmesh me raketa dhe dronë nga Hezbollahu në drejtim të veriut të Izraelit.
Këto sulme filluan më 2 mars, si hakmarrje për vrasjen e liderit suprem iranian, Ajatollah Ali Khamenei.
Ushtria izraelite tha se këto masa synojnë të ofrojnë një "shtresë shtesë sigurie për banorët e veriut të Izraelit".
Zërat brenda Iranit
Video të publikuara online më 2 mars tregojnë shkatërrimin masiv që shkaktuan raketat në Teheran, gjatë ditës së tretë të fushatës ushtarake të SHBA-së dhe Izraelit kundër Iranit.
Shoqata e Gjysmëhënës së Kuqe iraniane vlerësoi se numri i të vdekurve në këtë vend është mbi 500, ndërsa dhjetëra të tjerë janë vrarë në kundërgoditjet e Iranit nëpër rajon.
