Pse u sulmua Irani?
Operacioni i përbashkët i SHBA-së dhe Izraelit kundër Iranit, i koduar Tërbimi Epik, është tashmë në ditën e katërt.
Presidenti amerikan, Donald Trump, ka thënë se qëllim i operacionit është të "sigurojë që Irani të mos pajiset me armë bërthamore" dhe i ka kërkuar popullit iranian ta përmbysë regjimin klerik.
Operacioni - në të cilin është vrarë edhe udhëheqësi suprem i Iranit, Ajatollah Ali Khamenei - ka pasuar javë të tëra kërcënimesh nga Trumpi se do të urdhërojë veprime ushtarake, nëse Irani nuk bie dakord për një marrëveshje të re për programin e tij bërthamor.
Irani këmbëngul se aktiviteti i tij bërthamor është tërësisht paqësor.
Irani është përgjigjur duke lëshuar raketa dhe dronë në të gjithë rajonin, ndërsa grupi militant shiit, Hezbollah - me bazë në Liban dhe i mbështetur nga Irani - u është bashkuar luftimeve, duke lëshuar raketa në Izrael nga bazat e tij.
Izraeli thotë se ka goditur kompleksin presidencial të Iranit
Ushtria izraelite njoftoi se forcat ajrore kanë goditur kompleksin e udhëheqjes së regjimit iranian, përfshirë Zyrën Presidenciale dhe Këshillin e Lartë të Sigurisë Kombëtare.
Në një deklaratë në Telegram, Forcat e Mbrojtjes së Izraelit thanë se mbi objektiva është hedhur “një numër i madh municionesh”, duke shtuar se është goditur edhe një institucion trajnimi ushtarak, si dhe “infrastrukturë tjetër e rëndësishme e regjimit”.
Kompleksi është përdorur edhe nga ish-udhëheqësi suprem i Iranit, Ajatollah Ali Khamenei, sipas njoftimit.
Khamenei u vra në kompleksin e tij në fundjavë.
Katari mbulon shpenzimet e hotelit për turistët e bllokuar, njofton Ambasada e Kosovës në Doha
Ambasada e Republikës së Kosovës në Doha njoftoi se autoritetet e Katarit do t'i mbulojnë shpenzimet e akomodimit në hotel për turistët e bllokuar, që nuk mund të largohen nga ky vend, për shkak të kufizimeve të përkohshme të udhëtimit.
Vendimi ka hyrë në fuqi më 28 shkurt dhe do të zbatohet deri në rifillimin e operacioneve në aeroport dhe rihapjen e hapësirës ajrore.
Ambasada u bën thirrje qytetarëve të qëndrojnë të qetë dhe t'i respektojnë udhëzimet e autoriteteve vendase.
Shkatërrimet në Lindjen e Mesme të kapura nga sateliti
Imazhet para dhe pas tregojnë objektivat në Lindjen e Mesme të goditura nga sulmet e SHBA-së, Izraelit dhe Iranit.
Imazhet satelitore zbulojnë shkatërrimet në Lindjen e Mesme
Para
Pas
Para
Pas
Para
Pas
Para
Pas
