Nis protesta në Prishtinë, kërkohet votimi i ligjit në lexim të dytë
Në Prishtinë nisi protesta në mbështetje të ndryshimeve në Ligjin për Dhomat e Specializuara, një ditë pasi tubimi i së hënës u përshkallëzua në përplasje mes protestuesve dhe policisë.
Njëri nga organizatorët, Çlirim Haziri, u bëri thirrje deputetëve që ta votojnë projektligjin në lexim të dytë, duke paralajmëruar vazhdimin e protestave nëse kjo nuk ndodh.
“Ose votojeni ligjin, ose dilni në zgjedhje me ‘vulën e turpit’”, tha Haziri para protestuesve.
“Derisa ligji të votohet, ne nuk e bëjmë asnjë hap prapa”, shtoi ai.
Haziri iu drejtua gjithashtu deputetëve me fjalët: “Kjo masë do t’ju ndjekë si hije, sepse kush luan me themelet e kombit, nuk do të gjejë paqe”.
Projektligji u miratua në lexim të parë më 5 tetor, por votimi në lexim të dytë mbetet i papërfunduar.
Hamza: Kemi kërkuar seancë, nuk ka arsye pse mos të votohet ligji në lexim të dytë
Kryetari i Partisë Demokratike të Kosovës (PDK), Bedri Hamza, ka thënë se i ka kërkuar kryetares së Kuvendit, Albulena Haxhiu, të thërrasë seancë parlamentare për t’i votuar në lexim të dytë ndryshimet në ligjin për Gjykatën Speciale.
Hamza tha në një konferencë për media se deputetë të PDK-së dhe Aleancës dorëzuan nënshkrime për thirrjen e seancës për këtë ligj.
Ai tha se u ka çuar ftesë edhe deputetëve të partisë në pushtet, Lëvizja Vetëvendosje, dhe atyre të Lidhjes Demokratike të Kosovës për të marrë pjesë në seancë dhe për të votuar.
“Është rastësi që sot është afati i fundit për ta zgjedhur presidentin. Ne po e kërkojmë ligjin. Ne nuk i ngatërrojmë këto tema. Ne duam që ligji të aprovohet në dy lexime, dhe natyrisht që është mirë të kemi marrëveshje mes partive politike dhe vendi të këtë president për të mos shkuar në zgjedhje”, tha Hamza.
Ndryshimet për t’ia kufizuar kompetencat Gjykatës Speciale të Kosovës në Hagë kaluan në lexim të parë, por ato duhet të miratohen edhe në lexim të dytë për të pasur efekt.
Votimi mbeti pezull pas mospajtimeve mes PDK-së dhe LVV-së lidhur mënyrën se si të ecin përpara me këtë çështje dhe atë të zgjedhjes së presidentit të ri të Kosovës.
LVV-ja kërkon që para se ndryshimet të hidhen në votim në lexim të dytë, të zgjidhet presidenti i ri, por PDK thotë se ligji është “më i rëndësishëm”.
Hamza e përsëriti se nuk do të takohet me kryeministrin Albin Kurti për të biseduar për këtë pa kaluar ndryshimet.
“Qëndrimi ynë është i qartë, nuk kemi pse takohemi pa kaluar ligji në lexim të dytë”, shtoi ai.
Kurti, ndërkohë, do të mbajë konferencë për media në orën 15:00.
Të dashur lexues, faleminderit që përcillni Radion Evropa e Lirë!
Zhvillimet vazhdojnë, ndaj qëndroni me ne për të gjitha të rejat nga Prishtina.
Mbulimin e drejtpërdrejtë nga këtu e vazhdon Ekrem Idrizi.
Nga unë, Valona Tela, mirë mbetshi!
Kurti paralajmëron konferencë për media në orën 15:00
Kryeministri i Kosovës, Albin Kurti, do të mbajë konferencë për media në orën 15:00, ka njoftuar Zyra e Kryeministrit.
Konferenca do të mbahet në ndërtesën e Qeverisë.
Nuk është bërë e ditur tema për të cilën Kurti do t’u drejtohet mediave.
Konferenca vjen në ditën kur skadon afati për zgjedhjen e presidentit dhe ndërsa ende nuk ka marrëveshje mes partive për rrugën përpara.
Çfarë parasheh masa në të cilën këmbëngul PDK-ja?
Projektligji synon ta ngushtojë ndjeshëm juridiksionin e Dhomave të Specializuara, duke e kufizuar periudhën që ato mbulojnë nga 1 korriku 1999 deri më 31 dhjetor 2000 dhe duke përjashtuar veprat pa lidhje të drejtpërdrejtë me pretendimet e raportit të Këshillit të Evropës të vitit 2011.
Ai parasheh gjithashtu dënim maksimal prej 15 vjetësh burgim dhe transferimin në sistemin gjyqësor të Kosovës të rasteve që do të mbeteshin jashtë juridiksionit të ri.
Të dënuarit do të mund t’i vuanin dënimet në Kosovë, ndërsa parashihet edhe mundësia e ankesës në Gjykatën Supreme për çështjet e juridiksionit dhe, për dënimet e formës së prerë, mundësia e faljes presidenciale.
Miratimi i projektligjit, megjithatë, nuk do t’i anulonte automatikisht aktgjykimet ekzistuese dhe as nuk do të sillte vetvetiu lirimin e personave të dënuar.
Për më shumë lexoni këtu.