Trump konfirmon vrasjen e 48 udhëheqësve iranianë
Presidenti i SHBA-së, Donald Trump, tha të dielën se 48 udhëheqës të Republikës Islamike u vranë gjatë sulmeve të përbashkëta SHBA-Izrael ndaj Iranit.
“Nuk mund ta besojë askush suksesin që kemi pasur; 48 udhëheqës u vranë me një goditje dhe gjërat po lëvizin shumë shpejt”, tha Trump për Fox News.
Në një intervistë tjetër për CNBC, Trump tha se operacioni amerikan në Iran po shkon “shumë mirë” dhe “përpara afatit të planifikuar”.
“Ky është një regjim shumë i dhunshëm, një nga regjimet më të dhunshme në histori. Nuk po e bëjmë këtë vetëm për veten tonë, po e bëjmë për botën. Dhe, gjithçka po shkon përpara afatit”, tha presidenti amerikan.
Shtetet e Bashkuara dhe Izraeli filluan sulmet e tyre të përbashkëta kundër Iranit të shtunën në mëngjes, dhe deri tani, përveç vrasjes së Ali Khameneit, u konfirmuan edhe vdekjet e disa komandantëve të lartë të forcave të armatosura të Republikës Islamike.
Netanyahu: Fushata kundër Iranit vazhdon
Kryeministri i Izraelit, Benjamin Netanyahu, tha se “ka dhënë udhëzime për vazhdimin e fushatës” kundër Iranit.
Ai i bëri këto komente pas një takimi me ministrin e Mbrojtjes, shefin e stafit dhe kreun e shërbimit të sigurisë, Mossad.
“Forcat tona po godasin tani zemrën e Teheranit, me fuqi gjithnjë e më të madhe. Kjo do të rritet edhe më shumë në ditët në vijim”, tha Netanyahu.
“Këto, megjithatë, janë ditë të dhimbshme. Dje këtu, në Tel Aviv, dhe tani në Beit Shemesh, humbëm njerëz të dashur. Unë lutem me familjet e tyre, dhe në emër të të gjithë juve, qytetarëve të Izraelit, u uroj shërim të shpejtë të plagosurve”, shtoi Netanyahu.
Pas Khameneit, pasiguri për pasardhësin e tij
Njeriu që do ta pasojë Ali Khamenein si udhëheqës suprem i Iranit, do ta marrë drejtimin e shtetit në kohën kur zyrtarët amerikanë kanë bërë thirrje për rrëzimin e Qeverisë teokratike, që ka sunduar Iranin që nga viti 1979.
Von der Leyen bën thirrje për “tranzicion të vërtetë” në Iran
Presidentja e Komisionit Evropian, Ursula von der Leyen, paralajmëroi se rreziku i përshkallëzimit të tensioneve në Lindjen e Mesme është “real”, ndaj “tranzicioni i vërtetë” në Iran është urgjentisht i nevojshëm.
Ajo i bëri komentet në rrjetin social X, pas një bisede telefonike me Sheikun e Katarit, Tamim bin Hamad Al Thani.
Liderja e BE-së nuk përmendi Izraelin apo Shtetet e Bashkuara në mesazhin e saj, por tha se ajo dhe Sheiku Hamad kanë diskutuar për “pasojat e sulmeve të pamatura të Iranit” ndaj Katarit.
Të dielën në mëngjes u raportua për disa shpërthime në kryeqytetin e Katarit, Doha.
Sipas von der Leyenit, tranzicioni i vërtetë “duhet të nënkuptojë ndalimin e programeve ushtarake bërthamore dhe të raketave balistike të Iranit, si dhe përfundimin e veprimeve destabilizuese në ajër, tokë dhe det”.
Ajo gjithashtu bëri thirrje që çdo ndryshim të reflektojë “shpresat demokratike të popullit të guximshëm të Iranit”.