Kryeministri britanik premtoi vazhdimin e mbështetjes ushtarake për Ukrainën
Kryeministri britanik Boris Johnson, në një bisedë me presidentin ukrainas Volodymyr Zelensky, të dielën pasdite, më 20 mars, premtoi mbështetje të vazhdueshme ushtarake për Ukrainën.
"Kryeministri theksoi angazhimin e vazhdueshëm të Mbretërisë së Bashkuar për të punuar me partnerët ndërkombëtarë, për të koordinuar mbështetjen për forcimin e vetëmbrojtjes së Ukrainës”, thuhet në një deklaratë nga zyra e kryeministrit britanik.
Më deklaratë, gjithashtu thuhet se të dy udhëheqësit theksuan rëndësinë e sanksioneve për ushtrimin e presionit ndaj Putinit, si dhe dënuan sulmet ndaj civilëve të pafajshëm pas sulmit në Mariupol.
Zyrtari rus pranon se komandanti i marinës u vra në Ukrainë
Komandanti i lartë i flotës ruse të Detit të Zi u vra në Ukrainë, tha të dielën guvernatori i Sevastopolit, raportoi Reuters.
“Kapiteni Andrey Paliy, zëvendës komandanti i flotës, u vra gjatë luftimeve në qytetin port Mariupol, në lindje të Ukrainës”, shkroi guvernatori Mikhail Razvozhayev në Telegram.
Sevastopoli, në të cilin është baza kryesore e flotës ruse të Detit të Zi, ndodhet në gadishullin e Krimesë, të cilin Moska e aneksoi në 2014.
Mariupoli vazhdon të jetë skenë e disa prej tmerreve më të mëdha të luftës.
Çfarë po ndodh në këtë qytet dhe në qytete të tjera të Ukrainës?
A ka zhvillime të reja ushtarake?
Ku po ikin refugjatët ukrainas?
Më poshtë mund të mësoni disa prej gjërave kryesore rreth luftës:
Zelensky: Në Moskë flasin për “zgjidhjen përfundimtare”
Presidenti ukrainas Volodymyr Zelensky, përmes një video-lidhjeje iu drejtua Parlamentit izraelit .
Presidenti i Ukrainës tërhoqi paralele mes pushtimit rus të Ukrainës dhe Luftës së Dytë Botërore. Ai tha se ky “nuk ishte një operacion ushtarak”.
“Kjo është luftë në shkallë të gjerë që synon të shkatërrojë popullin tonë, të shkatërrojë fëmijët tanë, familjet, shtetësinë, qytetet, kulturat dhe gjithçka që i bën ata ukrainas. Prandaj kam të drejtë ta bëj këtë paralele në histori. Luftërat tona për mbijetesë dhe Lufta e Dytë Botërore”, tha ai.
Zelensky u tha ligjvënësve izraelitë se Partia Naziste (Nationalsozialistische Deutsche Arbeiterpartei - NSDAP) u krijua në Gjermani, 102 vjet më parë, më 24 shkurt 1920 dhe në të njëjtën datë të sivjetme, Rusia pushtoi Ukrainën.
“Ata sërish po i thonë këto fjalë – “zgjidhja përfundimtare” - duke u referuar ndaj nesh, popullit ukrainas... kjo u tha në takimin në Moskë”, tha Zelensky, i cili është hebre.
“Zgjidhja përfundimtare” (Endlösung) ishte emri i planit të Gjermanisë naziste për gjenocidin sistematik kundër hebrenjve evropianë, i cili çoi në fazën e fundit, më vdekjeprurëse të Holokaustit (Shoah). Disa nga të afërmit e Zelenskyt u vranë në Holokaust.
Ai i bëri thirrje Izraelit që të ndihmojë popullin ukrainas në rezistencën e tyre kundër ushtrisë ruse.
Lajmin e plotë mund ta lexoni KËTU