OBSH: 62 sulme në objektet shëndetësore në Ukrainë
Organizata Botërore e Shëndetësisë (OBSH) ka raportuar se ka konfirmuar 62 sulme të veçanta në objektet shëndetësore në Ukrainë, që nga fillimi i pushtimit rus gati katër javë më parë.
Organizata tha se nga këto sulme u vranë 15 persona dhe të paktën 37 u plagosën.
Ndërkohë, zyrtarët e OBSH-së në Poloni thonë se një vlerësim i shpejtë tregon se rreth gjysmë milioni refugjatë që kanë arritur atje kanë probleme psikologjike, kryesisht për shkak të traumave.
Gjithashtu, punonjësit e shëndetësisë në kufi, raportojnë për ardhjen e fëmijëve dhe nënave që vuajnë nga rraskapitja dhe dehidratimi, ndërsa shumë të moshuar vijnë pas disa ditësh udhëtim pa mjekim, veçanërisht për sëmundje të tilla si diabeti dhe presioni i lartë i gjakut.
Agjencia e Kombeve të Bashkuara për refugjatë (UNHCR) thekson se 3,5 milionë njerëz kanë ikur nga Ukraina.
Kjo shifër po i afrohet vlerësimit fillestar prej katër milionësh, ndërkaq që Agjencia pranoi sot se kjo shifër së shpejti mund të tejkalohet.
Pasojat e sulmit rus ndaj spitalit të lindjes në Mariupol
Ukraina pretendon se ka rikthyer kontrollin e Makarivit
Pas disa ditësh luftime, forcat ukrainase kanë rikthyer kontrollin e Makarivit, qytezë rreth 50 kilometra në perëndim të Kievit, kanë thënë Forcat e Armatosura të Ukrainës përmes një postimi në Facebook.
“Flamuri shtetëror i Ukrainës është ngritur mbi qytetin e Makarivit”, derisa rusët janë tërhequr, është thënë në postim.
Radio Evropa e Lirë nuk ka mundur të konfirmojë këtë pretendim.
Makariv ka pësuar dëme të mëdha nga sulmet e vazhdueshme ajrore të Rusisë.
Rrjeti televiziv amerikan, CNN ka thënë se ka arritur të verifikojë vërtetësinë e fotografive të publikuara në rrjetet sociale më 12 mars, të cilat kanë treguar dëme të mëdha në ndërtesa banimi, shkolla dhe objekte shëndetësore.
Ministria ruse e Mbrojtjes pretendon vazhdimisht se nuk është duke shënjestruar civilët, pavarësisht dëshmive për të kundërtën.
Zelensky para deputetëve italianë: Jemi në prag të mbijetesës
Presidenti ukrainas, Volodymyr Zelensky i është drejtuar Parlamentit italian përmes video-lidhjes.
Ai u ka thënë deputetëve italianë se shteti i tij është në prag të mbijetesës së luftës me Rusinë dhe ka paralajmëruar se Moska dëshiron të depërtojë në pjesën tjetër të Evropës, ka raportuar agjencia e lajmeve, Reuters.
“Për trupat ruse, Ukraina është porta e Evropës, ata duan të hyjnë brenda, mirëpo barbarizmi nuk duhet të depërtojë”, ka thënë ai.
Ai ka përsëritur thirrjet e bëra në adresimet para parlamenteve të shteteve tjera, që Rusia të sanksionohet më shumë.
Kryeministri italian, Mario Draghi, ka thënë se shteti i tij dëshiron ta shohë Ukrainën në Bashkimin Evropian dhe se duhet ofruar ndihmë ushtarake për të, në mënyrë që të ndalen masakrat.
Gazetari rus vendos në ankand Çmimin e tij Nobel për t'iu ndihmuar refugjatëve ukrainas
Kryeredaktori i gazetës së pavarur Novaya Gazeta – me bazë në Moskë – Dmitry Muratov, do ta vendosë në ankand medaljen e tij të Çmimit Nobel, me qëllim të mbledhjes së fondeve për refugjatët ukrainas, të cilët kanë ikur për shkak të pushtimit të paprovokuar të Ukrainës nga ana e Rusisë.
Muratov, i cili është nderuar me Çmimin Nobel për Paqe më 2021, për betejën e tij që të ruajë të vërtetën si gazetar, e ka bërë të ditur këtë njoftim në gazetën e tij më 22 mars.
“U bëj thirrje grupeve të ankandeve, që janë të interesuara për këtë çmim të njohur në gjithë botën, të na kontaktojnë neve”, ka thënë Muratov, i cili ka fituar çmimin bashkë me Maria Ressan, bashkëthemeluese e faqes Rappler, e cila njihet si platformë kundër Qeverisë së Filipineve.
Muratov dhe Novaya Gazeta kanë bërë të ditur këtë njoftim, duke bërë thirrje edhe për zbatim të pesë masave në Ukrainë: armëpushim, shkëmbim të të burgosurve, riatdhesimin e të vdekurve, krijimin e korridoreve humanitare dhe ofrimin e ndihmës për refugjatët”.
