Zelensky: Rusia ka sulmuar një spital në Mariupol
Presidenti ukrainas, Volodymyr Zelensky, ka akuzuar Rusinë se të mërkurën ka kryer sulme ndaj një maternitet në qytetin jugor të Mariupolit.
Ai tha se ka fëmijë që kanë mbetur “nën rrënoja”.
Këshilli i qytetit tha po ashtu se spitali është shkatërruar. Ky këshill nuk dha shifra për viktima, por shtoi se “shkatërrimi është kolosal”.
Kremlin: Putin dhe Scholz biseduan për përpjekjet “diplomatike” për Ukrainën
Presidenti rus, Vladimir Putin, dhe kancelari gjerman, Olaf Scholz, të mërkurën kanë biseduar për rrugët diplomatike për zgjidhjen e konfliktit në Ukrainë dhe për zbatimin e korridoreve humanitare për evakuimin e civilëve, tha Kremlini.
“Në kontekstin e situatës rreth operacionit të posaçëm ushtarak për ta mbrojtur Donbasin, janë diskutuar një sërë përpjekjesh politike dhe diplomatike, veçanërisht për rundin e tretë të bisedimeve midis delegacionit rus dhe përfaqësuesve të autoriteteve të Kievit”, tha Kremlini përmes një deklarate.
Kremlini po ashtu tha se dy liderët kanë biseduar për “aspektet humanitare të situatës” në Ukrainë dhe për rajonet separatiste, përkatësisht për Luhanskun dhe Donjeckun, që njihen me termin Donbas.
Kremlini tha se Putin e ka njoftuar kancelarin Scholz për hapat që po merren për evakuimin e civilëve.
“Shkatërrim kolosal” nga sulmet ajrore në spitalin e Mariupolit
Në videon e mëposhtme mund të shikoni dëmet e shkaktuara në spitalin e fëmijëve dhe maternitetin e Mariupolit, qytet në jug të Ukrainës. Autoritetet ukrainase fajësuan Rusinë për këtë sulm. Ata thanë se shkatërrimi në këtë spital ishte "kolosal".
Johnson: Putin do të mbahet përgjegjës për krimet e tij të tmerrshme
Kryeministri i Britanisë, Boris Johnson, ka reaguar pas sulmit rus ndaj një spitali të fëmijëve dhe maternitetit në Mariupol të Ukrainës.
“Ka pak gjëra më të liga sesa të shënjestrosh më të pambrojturit”, ka shkruar ai në Twitter.
Ai tha se shteti i tij po shikon për mënyra për të ndihmuar Ukrainën që të mbrohet kundër sulmeve ajrore.
Johnson tha se Qeveria britanike do ta mbajë përgjegjës presidentin rus, Vladimir Putin, “për krimet e tij të tmerrshme”.