Ukraina: Afër 1,300 trupa ukrainase janë vrarë dhe 500 rusë janë dorëzuar
Presidenti i Ukrainës, Volodymyr Zelensky, tha të shtunën se afër 1,300 trupa ukrainase janë vrarë gjatë 17 ditëve të pushtimit rus.
Burimet perëndimore kanë thënë të premten se afër 6,000 trupoa ruse janë vrarë që prej nisjes së luftës në Ukrainë.
Në një konferencë për media nga Kievi, Zelensky pretendoi se afër 500-600 trupa ruse janë dorëzuar ndaj forcave ukrainase të premten.
OKB thotë se 579 civilë janë vrarë që prej se ka nisur lufta në Ukrainë
Zyra për të Drejtat e Njeriut e Kombeve të Bashkuara tha se të paktën 579 civilë janë vrarë në Ukrainë që prej nisjes së luftës më 24 shkurt, dhe mbi 1,000 të tjerë janë plagosur.
Sipas këtij institucioni, 42 prej viktimave ishin fëmijë, ndërkaq 54 të tjerë janë plagosur.
Një ditë më parë, OKB-ja tha se ka dokumentuar vdekjen e 564 civilëve dhe plagosjen e 982 të tjerëve.
Shumica e viktimave janë shkaktuar nga përdorimi i armëve shpërthyese “me një zonë të gjerë ndikimi”, siç janë granatimet me artileri të rëndë dhe sulmet me raketa.
Zyrtarët e OKB-së thanë se besojnë se numri real i viktimave të jetë shumë më i lartë.
Zelensky: Armëpushimi duhet t’i paraprijë negociatave të paqes
Presidenti i Ukrainës, Volodymyr Zelensky, deklaroi të shtunën se çdo negociatë me Rusinë nuk mund të fillojë para se të arrihet një marrëveshje e armëpushimit ndërmjet forcave të Kievit dhe Moskës.
“Diplomatët tanë po punojnë dhe ata kanë biseduar për disa pika të agjendës së mundshme midis nesh dhe Federatës Ruse. Unë dua që kjo të materializohet dhe procesi i dhënies fund të luftës, procesi i paqes 100 për qind duhet të fillojë me armëpushim”, tha Zelensky gjatë një konference për gazetarë.
Por, lideri ukrainas tha se është i hapur për diskutime me presidentin rus, Vladimir Putin, dhe shtoi se ai e ka diskutuar mundësinë që negociatat të mbahen në Jerusalem me kryeministrin izraelit, Naftali Bennett.
*Lajmin e plotë mund ta lexoni KËTU
Rusia: Autokolonat e Perëndimit që dërgojnë armë në Ukrainë mund “të shënjestrohen”
Zëvendësministri i Jashtëm i Rusisë, Sergei Ryabkov, paralajmëroi se autokolonat perëndimore që dërgojnë armë në Ukrainë mund të jenë “shënjestra legjitime” për Forcat e Armatosura të Rusisë.
Duke folur për median shtetërore ruse, Ryabkhov tha se: “Ne kemi paralajmëruar Shtetet e Bashkuara se dërgimi i armëve në Ukrainë, që ata e kanë orkestruar, nga një numër i shteteve, është një lëvizje e rrezikshme – është një lëvizje që i kthen ato autokolona në shënjestra legjitime”.
“Ne kemi paralajmëruar për pasojat që mund të prodhojë ky transferim i pamatur në Ukrainë i armëve, të tilla si sistemet portative të mbrojtjes ajrore, sistemet raketore, kundërtanket e të tjera”, shtoi ai.
Ryabkov pretendoi se SHBA-ja nuk i ka marrë seriozisht paralajmërimet e Rusisë.
