Takimet Ukrainë-Rusi vazhdojnë përmes video-lidhjes
Këshilltari i Presidencës ukrainase, Mykhailo Podolyak, bëri të ditur të shtunën se bisedimet me delegacionin e Federatës Ruse po vazhdojnë përmes video-lidhjes.
“Janë krijuar nëngrupe të posaçme të punës. Qëndrimet e Ukrainës janë të përcaktuara nga direktivat e mëparshme”, shkroi ai në Twitter.
Që prej nisjes së pushtimit të Ukrainës nga Rusia më 24 shkurt, delegacionet e Ukrainës dhe Rusisë janë takuar tri herë në Bjellorusi, ku kanë diskutuar për armëpushim dhe hapjen e korridoreve humanitare.
Edhe pse disa herë janë hapur korridore humanitare, Kievi ka akuzuar Moskën se ka shkelur marrëveshjet e armëpushimit dhe ka sulmuar caqe civile.
Të shtunën, autoritetet e mbrojtjes së Ukrainës raportuan për shtatë të vrarë gjatë evakuimeve nga një fshat në afërsi të Kievit. Ukraina tha se forcat ruse hapën zjarr teksa një konvoj me gra dhe fëmijë po tentonin të largoheshin.
Ukraina dhe Rusia po ashtu kanë zhvilluar një takim në Antali. Kryediplomatët e të dy shteteve u takuan gjatë kësaj jave në këtë qytet turk, por takimi përfundoi pa rezultate konkrete.
Jeta në qytetin ukrainas të kontrolluar nga Rusia
Në ditën e parë të pushtimit rus të Ukrainës, forcat ruse lëvizën rreth 50 kilometra nga rajoni i okupuar ukrainas i Krimesë për në qytetin e Oleshkit, që gjendet pranë qytetit jugor të Hersonit.
Shumica e trupave ruse janë larguar tashmë, por ky qytet është prapa vijës dhe i shkëputur nga Qeveria në Kiev.
Kryetari i këtij qyteti ka rrëfyer për Radion Evropa e Lirë se me çfarë sfidash po përballen banorët pasi qyteti ra në duart e rusëve.
*Tekstin e plotë mund ta gjeni KËTU
Kuleba: Do të negociojmë, por nuk do të dorëzohemi
Ministri i Jashtëm i Ukrainës, Dmytro Kuleba, tha se shteti i tij është i gatshëm të hyjë në negociata me Rusinë, por forcat ukrainase nuk do të dorëzohen para regjimit të Vladimir Putinit dhe nuk do të pranojnë ultimatume.
Duke folur në një ngjarje virtuale, Kuleba u tha gazetarëve se ai është i hapur për diskutime diplomatike me Moskën, por paralajmëroi se Rusia po shtyn përpara kërkesa që janë të papranueshme për Ukrainën.
Ai tha se forcat e Kievit kanë nevojë për më shumë furnizime ushtarake dhe ripërsëriti kërkesën e Ukrainës që shtetet perëndimore duhet ta furnizojnë Kievin me avionë luftarakë, duke shtuar se jeta e civilëve mund të shpëtohet vetëm nëse forcohet mbrojtja ajrore.
Ai po ashtu tha se Moska po përdorë taktika të ngjashme shkatërruese që janë përdorur gjatë luftës civile siriane dhe ftoi shtetet perëndimore që të ndihmojnë Ukrainën që të hetojë krimet e pretenduara të luftës të kryera nga Rusia.
Zelensky: 1,300 ushtarë ukrainas janë vrarë
Presidenti i Ukrainës, Volodymyr Zelensky, në një konferencë për gazetarë në Kiev, tha se deri më 12 mars janë vrarë 1,300 ushtarë ukrainas. Ai tha se në luftën në Ukrainë, forcat e shtetit të tij kanë vrarë 12,000 ushtarë rusë, duke shtuar se ai nuk është i lumtur për këtë fakt, pasi siç tha, ky nuk është vizioni i tij për botën.
