Hamza përsërit se kontributi i PDK-së për presidentin ka përfunduar
Kreu i PDK-së, Bedri Hamza, përsëriti qëndrimin se partia e tij ka përmbyllur kontributin për çështjen e presidentit.
Ai tha se të gjitha propozimet e bëra nga partia e tij “nuk janë marrë në konsideratë” nga LVV-ja.
“Ju uroj sukses në zgjedhjen e presidentit me 90 deputetët” e tjerë të Kuvendit, tha Hamza pas përfundimit të seancës së rregullt plenare.
I pyetur nëse do të votonte dikë nga familja e heroit të Kosovës, Adem Jashari, Hamza tha se në këtë drejtim qëndrimi i partisë nuk ka ndryshuar – teksa paraprakisht kishte shprehur mbështetje për ndonjë kandidat nga kjo familje.
E nëse LDK-ja e propozon ish-presidenten Vjosa Osmani, Hamza tha se ajo mund të zgjidhet me votat e LDK-së dhe LVV-së.
Hamza tha se me LVV-në diskutimet asnjëherë nuk kanë arritur deri te emrat e përveçëm.
Ai nuk tregoi nëse deputetët e partisë së tij do të marrin pjesë në seancën për presidentin.
AAK po ashtu nuk merr pjesë në seancën e Kuvendit për Presidentin
Besnik Tahiri, shef i grupit parlamentar i Aleancës për Ardhmërinë e Kosovës tha se nuk do të marrin pjesë në seancën e Kuvendit të Kosovës për diskutim lidhur me zgjedhjen e presidentit.
Tahiri tha se diskutime serioze për presidentin ishin dashur të bëhen tash e tre muaj.
“AAK nuk ka qenë e ftuar në këto diskutime, nuk ka marrë pjesë dhe rrjedhimisht ne nuk marrim pjesë në një diskutim që sërish është një performancë publike”, tha Tahiri.
Ai shtoi se diskutimi i sotëm pritet të jetë "diskutim për të folur vetmëvete”, duke iu referuar partisë në pushtet, Lëvizjes Vetëvendosje.
Nagavci pret nga LDK nënshkrimet për presidentin
Shefja e Grupit Parlamentar të LVV-së, Arbërie Nagavci, në fund të seancës së rregullt plenare, teksa po fliste për bordin e AKP-së, iu drejtua deputetëve të LDK-së, duke u thënë se po i pret nënshkrimet e tyre për një kandidat për president.
“E votojmë bordin [e AKP-së], vazhdojmë tutje sepse kemi ftuar edhe një seancë në orën 17:00, e kemi tema të rëndësishme besoj për të diskutuar, siç është tema për zgjedhjen e presidentin sepse po na presin të gjithë dhe unë po pres nënshkrimet tuaja”, tha Nagavci duke drejtuar dorën në anën ku janë të ulur 15 deputetët e LDK-së.
LDK ka thënë më herët se mund ta propozojë ish-presidenten Vjosa Osmani edhe për një mandat pesëvjeçar, por ka kërkuar që LVV-ja t’ia sigurojë 66 vota.
Nuk dihet nëse LVV-ja do ta pranojë këtë kërkesë të LDK-së.