Ndërlidhjet

Luftime të reja në Pashnjir të Afganistanit


Një militant taliban drejton armën në drejtim të aparatit fotografik jasht aeroportit të Kabulit.
Një militant taliban drejton armën në drejtim të aparatit fotografik jasht aeroportit të Kabulit.

Në luginën e Panjshirit në Afganistan janë raportuar luftime të reja ndërmjet talibanëve dhe grupeve të armatosura që kundërshtojnë sundimin e tyre. Lugina Panjshir, në veri të kryeqytetit Kabul, është një nga provincat më të vogla të Afganistanit dhe e vetmja që nuk ka rënë në duart e talibanëve.

Aty jetojnë diku midis 150,000 dhe 200,000 njerëz.

Që kur talibanët pushtuan Kabulin më 15 gusht, militantët u përballën me rezistencë nga grupet opozitare dhe ish-pjesëtarë të ushtrisë afgane në Luginën Panjshir. Raportet për luftime të reja vijnë derisa talibanët kanë paralajmëruar se së shpejti do të formojnë një qeveri të re.

Rezistenca ndaj talibanëve udhëhiqet nga udhëheqësi fisnor lokal, Ahmad Masoud. Babai i tij kishte luftuar kundër pushtimit sovjetik më 1980 dhe atij taliban në vitet 1990.

Përmes një video mesazhi dërguar në BBC, zëvëndëspresidenti i Afganistanit, Amrullah Saleh tha se janë regjistruar viktima nga të dyja palët. Saleh po bën përpjekje t’i prijë rezistencës ndaj talibanëve.

"Jemi në një situatë të vështirë pasi jemi nën pushtimin e talibanëve", tha ai, duke shtuar se forcat e tij nuk do të dorëzoheshin.

Në fund të muajit gusht, forcat amerikane u tërhoqën nga Afganistani, pas 20 vjetësh prani në këtë vend.

SHBA-ja dhe aleatët pushtuan Afganistanin në vitin 2001, për të rrëzuar talibanët nga pushteti, pasi në atë kohë strehonin kreun e grupit militant Al-Kaida, Osama bin-Laden, i cili kishte urdhëruar sulmet terroriste të 11 shtatorit 2021 në SHBA.

XS
SM
MD
LG