Abdixhiku: Nuk e kuptoj pse Kurtit po i pengon Osmani, por populli do ta zgjedhë
Kreu i LDK-së, Lumir Abdixhiku, gjatë adresimit nga holli i Kuvendit tha se nuk e kupton pse kryeministrit Albin Kurti i pengon ish-presidentja Vjosa Osmani.
“Çfarë nuk arrij të kuptoj unë është çfarë po i pengon Vjosa Osmani, Albin Kurtit, kaq shumë? Ndoshta Kurti nuk dëshiron ta zgjedhë, por ja që jam i bindur që populli i Kosovës do ta zgjedhë”, tha ai para nisjes së seancës.
Abdixhiku foli edhe për 15 nënshkrimet e mbledhura nga partia e tij, duke thënë se nuk kanë treguar se për kë janë mbledhur, pasi për këtë duhet një dakordim me LVV-në, që do të plotësonte pjesën tjetër të 15 nënshkrimeve të kërkuara.
“Ai [Kurti] duhet të na tregojë nëse ka vota për Vjosa Osmanin. Unë me sa e kuptova ai do që Vjosa të jetë kundërkandidate e Ferides. Në këto rrethana ai po kërkon kundërkandidat”, tha Abdixhiku.
Ai tha se Kosova po shkon drejt zgjedhjeve të reja.
Nis seanca
Në Kuvendin e Kosovës, pa praninë e partive opozitare, kryeparlamentarja Albulena Haxhiu, ka nisur punimet e seancës për zgjedhjen e presidentit.
Haxhiu sërish ndërprenë seancën, ajo vazhdon në orën 23:00
Kryeparlamentarja Haxhiu, disa minuta pasi rinisi seanca, e ndërpreu atë për shkak të mospjesëmarrjes së deputetëve nga partitë opozitare.
Ajo tha se punimet do të rinisin në orën 23:00 – fiks një dorë para se të skadojë afati kushtetues për zgjedhjen e kreut të ri të shtetit.
Nëse deputetët dështojnë të zgjedhin presidentin e ri, Kosova do të shkojë në zgjedhje.
Sa i kushtojnë zgjedhjet Kosovës?
Zgjedhjet e parakohshme parlamentare të dhjetorit, Kosovën e kanë kushtuar rreth 7 milionë euro. Këto ishin të dytat me radhë të mbajtura gjatë vitit 2025.
Ky vit nuk është një vit zgjedhor, që do të thotë se Komisioni Qendror i Zgjedhjeve nuk i ka mjetet e planifikuara nëse do të mbaheshin zgjedhje të reja.
Në rast se nuk zgjidhet presidenti dhe vendi shkon në zgjedhje, KQZ do të duhet t'i drejtohet Qeverisë për këto mjete.
