Shtetrrethim në Porto Riko
Territori amerikan i Porto Rikos ka vendosur shtetrrethim për të penguar përhapjen e koronavirusit.
“Duhet të ndërmarrim masa të fuqishme, ashtu si edhe vendet e tjera”, tha guvernatori Wanda Vazquez Garced.
Përjashtime nga shtetrrethimi bëjnë njerëzit që kanë leje për të punuar.
Shtetrrethimi, që nis të dielën, do të jetë në fuqi nga ora 21:00 deri në 05:00, sipas kohës lokale.
Bizneset, përveç barnatoreve, shërbimeve shëndetësore, dyqaneve ushqimore dhe bankave, po ashtu pritet të mbyllen pjesërisht, raportojnë mediat lokale.
Porto Riko ka tre raste të konfirmuara me koronavirus.
Holanda mbyll shkollat
Ministri i Shëndetësisë i Holandës, Bruno Bruins, tha se shkollat në këtë vend do të mbyllen nga e hëna deri më 6 prill, si masë parandaluese kundër koronavirusit.
Baret, kafenetë dhe klubet sportive do të mbyllen qysh sonte.
Kryeministri i Holandës, Mark Rutte, do t’i drejtohet kombit të hënën.
Ministria e Shëndetësisë e Holandës ka raportuar për 176 raste të reja me koronavirus në 24 orët e fundit dhe për tetë persona të vdekur nga sëmundja që e shkakton koronavirusi, COVID-19.
Numri i përgjithshëm i të infektuarve në këtë vend aktualisht është 1,135.
Mbylljen e shkollave e kanë bërë edhe vende të tjera në Evropë, përfshirë Kosovën.
Rekord i ri viktimash nga koronavirusi në Itali brenda një dite
Italia raportoi të dielën edhe për 368 vdekje nga koronavirusi – një rekord ky i ri viktimash brenda një dite.
Prej tyre, 252 vdekje janë shënuar në Lombardi, rajonin e goditur më së keqi në Itali.
Në mbarë vendin, numri total i të vdekurve është mbi 1,800.
E gjithë Italia, tash e sa ditë, është në karantinë të përgjithshme.
Lexoni edhe këtë:
Pse Koreja e Jugut është më e suksesshme se Italia në shtypjen e koronavirusit?
Asnjë rast i ri me koronavirus në Maqedoni të Veriut
Maqedonia e Veriut të dielën nuk ka regjistruar asnjë rast të ri me koronavirus.
Shtatë personat që janë testuar për koronavirusin kanë rezultuar negativë nga analizat e bëra nga laboratori i Virusologjisë dhe Diagnostikës Molekulare.
Bëhej fjalë për shtetas nga disa qytete, të cilët para disa ditësh ishin kthyer nga Zvicra, Austria dhe Gjermania.
Në mesin e personave që janë testuar gjendeshin edhe dy gra shtatzëna nga Dibra.